Madaxweyne Cosoble oo ku dhawaaqay gogol lagu dhisayo maamul gobolleed uu yeesho gobolka Banaadir
Talaado, May, 23, 2017 (HOL) -
Madaxweynaha maamul gobolleedka Hirshabeelle Cali C/llaahi Cosoble ayaa oo ka
qeybgallayay munaasabad soo dhaweyn ah oo loogu sameeyay magaalada Nairobi ayaa
halkaa uga dhawaaqay gogol lagu dhisayo sida uu hadalka u dhigay maamul uu
yeesho gobolka Banaadir.
“Gobolka Banaadir waxaa ku nool 3
Milyan oo ruux oo Soomaali ah, sidaa daraadeed suurtagal ma’aha in la yiraahdo
wax matalaad ah malaha, waxaan halka idinka cadeynayaa in maamulka Hirshabeelle
uu dhigayo degmada Balcad gogol lagu dhisayo maamulka uu yeesho gobolka
Banaadir, cid kasta oo arintaa ay quseyso waa in ay ka soo qeybgashaa’’ ayuu
yiri madaxweynaha maamul gobolleedka Hirshabeelle.
Kulanka ayaa sidoo kale waxaa ka hadlay Senetor Muuse Suudi Yalaxoow oo ka
mid ah siyaasiyiinta u olaleynaya maqaamka gobolka Banaadir.
Arrinta ku saabsan maqaamka Gobolka Banaadir ayaa ahaa mid aad u sii
xoogeysanayay muddooyinkii u dambeeyay, waxaana Muqdisho ka dhacayay shirar
looga hadlayay arrintan oo ay horboodayeen siyaasiyiin, waxgarad iyo Senator
Muuse Suudi Yalaxow.
Kulanka oo ay soo qabanqaabiyeen Jaaliyada Hirshabeelle ee magaalada Nairobi ayaa lagu qabtay hoteelka Laico Regency Hotel.
C/raxmaan Diini, Hiiraan Online
[email protected]
