Rajadii mideynta qoysaska Somalida Sweden oo soo iftiimeysa

Axad, September 18, 2011(HOL):  Sida aan ka soo xiganay Wargeysa thelocal.se ee ka soo baxa dalka Sweden waxaa dib loo mideyn doonaa horraanta sanadka soo socda ee 2012 kumanaan kun oo Qoysas Soomaaliyeed ah, kuwaasi oo muddo sanado ah kala xayiran, iyadoo arrintanna la sheegay in ay tahay tallaabta koowaad ee mideynta qoysaska Soomaalida.

Qorshahan lagu mideynayo qoysaska Soomaalida oo ay horay ugu heshiiyeen xisbiga talada dalka Sweden haya ee Moderate Party iyo Xisbiga Green Party ayaa wuxuu hadda u muuqdaa mid dar dar la soo baxaya, iyadoo rajo wanaagsan laga qabo in heshiiskan uu Baarlamaanka si sharci ah uga gudbo.

Labadan Xisbi ee Moderate Party iyo Green Party ayaa horraantii sanadkan 2011 waxay ku heshiisyeen in Qoysaska Soomaalida la isu keeno, iyagoo isla gartay in caqabadda aqoonsi la’aantana lagu xaliyo in DNA laga qaado caruurta iyo waalidiinta Soomaalida.

Arrinta mideynta qoysaska, gaar ahaan kuwa Soomaalida ayaa waxay hakad gashay ilaa iyo xagaagii sanadkii 2010, waxaana taasi ugu wacnaa Dowladda Sweden oo adkeysay sharciyada lagu mideynayo qoysaska Soomaalida sabab la xiriirta in aaney jirin caddeymo lagu qanci karo oo ay dadka Soomaaliyeed leeyihiin maadaama ay muddo 20 sano ka badan ay dowlad la’aan soo ahaayeen.

Kumanaan kun oo qoysas Soomaaliyeed ah ayaa arrintan hakinta mideynta qoysaska darteed waxay ku galeen xerooyin qaxooti oo ku yaalla bariga Afrika, iyadoo haatan ay ka jiraan Bariga Afrika abaaro  dadkii iyo duunyadii galaafatay, haba ugu sii darnaatee Dalka Soomaaliya oo abaarta ay u wehliso nabad la’aan.

Isbedel sharciyeedkan laga rajenayo Dowladda Sweden ayaa haddii uu dhaqan-galo waxaa uu micnaheedu noqonayaa in 4,000 oo Soomaali ah oo u badan caruur loo ogolaan doono in ay yimaadaan Sweden, inkastoo aan la hubin in dhammaan afartaas kun ay wada heli doonaan ogolaasho deganaasho.

Sanadkanka soo socda ee 2012 ayay Dowladda Sweden ugu talagashay dhaqaale gaaraya 850 Milyan oo Kronor (130 Milyan oo Doollar)  in ay wax uga qabato  dib u qaabeynta sharciyada mideynta qoysaska  iyo weliba waxbarasho-siinta caruurta aan la aqoonsan ee ku nool dalka Sweden.



Salaad Iidow Xasan (Xiis), Hiiraan Online

[email protected]