Degmada Ufayn ee gobolka Bari oo markii horaysay yeelanaysa Cisbitaal dadka lagu daweeyo

Axad, September 18, 2011 (HOL) — Shirkadda African Oil ayaa lacag dhan 35,000 $ oo dollar  ugu deeqday dadka deegaankaasi ,si halkaasi looga hirgalayo mashaariic hormarineed oo bulshada faa'iido u leh ,iyadoo lacagtaasi lagu wareejiyay maamulka halkaa ka jira.

Gudoomiye ku xigeenka degmadaasi Bashiir Cabdi Xuseen ayaa sheegay in gudaha degmadaasi laga dhisi doono cisbitaal wayn si loogu daweeyo dadka xanuunada kala duwan qaba,iyadoo horay adeegyada caafimaad loogu soo doonan jiray magaalada Bosaaso ee xarunta gobolka Bari.

"Shir ay wada qaateen maamulka iyo waxgaradka ayaa go'aan lagu gaaray in lacagtaasi deeqda ah looga faa'idaysto cisbtaal loo dhiso bulshada halka ku dhaqan "ayuu yiri Bashiir Cabdi Xuseen oo la hadlay warbaahinta,isagoo tilmaamay in baahi dhinaca caafimaadka ah ay halkaa si daran uga jirto.

Waxaa kaloo Bashiir uu sheegay in degmada iminka ay ku sugan yihiin injineeradii dhisi lahaa cisbitalka si ay u qiimeeyaan qiimaha uu ku kacayo,waxaana qurbo joogta gobolka Bari uu ugu baaqay in ay ololahan ka qayb-galaan.

"Lacagtan maamulka ayaa la wareegay waxaana jira xiriiriye African Oil ka socda oo qiimaynaya sida lacagta loo maamulo"ayuu hadalkiisa ku daray ,isagoo u mahad celiyay cid kasta oo gacan ka gaysatay in deeqdan ay ka helaan shirkaddaasi oo fadhigeedu yahay dalka Canada ,balse shidaal baaris  ka wadda deegaanada Puntland.

Sidoo kale masuulkan ayaa sheegay in ay jiraan qaybo ka dhimanaan doona cisbitalkan hadii la dhamaystiro,isagoo bulshada degmadaasi ka dalbaday in ay taageeraan qorshe kasta oo Ufayn lagu hormarinayo,iyadoo ay tahay markii ugu horaysay oo cisbitaal noocaan ah halkaa laga hirgalinayo.

Ugu danbayntii dhismaha cisbitalkan ayaa la aaminsanyahay in uu dabooli doono baahi badan oo xagga caafimaadka ah,taasi oo ka jirtay meelo kamid ah tuulooyinka la diriska halka laga hirgalinayo,waxaana dhici karta in loo baahdo dhaqaale ka badan inta hadda ay gacanta ku hayaan maamulka Ufayn.

Faysal Maxamed Hassan,Hiiraan Online
[email protected]
Bosaaso,Soomaaliya