Diridhabe : Wararkii ugu dambeeyay ee rabshadihii halkaa ka dhacay xalay ilaa maanta
Axad, April, 14, 2019 (HOL) – Xaaladda magaalada Diridhabe ayaa wali aan degganayn, kaddib
rabshado u dhaxeeyay Soomaalida iyo Oromada oo habeenimadii xalay ilaa maanta
galinkii hore ay ka socdeen xaafadaha Lagahare, Sh Xabiib iyo agagaarka Suuqa
wayn ee Ashawa.
Galinkii hore ee maanta ayaa waxaa
la soo buux dhaafiyay goobihii ay rabshadu ka dhacaysay Ciidanka Militariga
waxayna xidheen guud ahaan waddooyinkii xaafadahaas sidoo kale waxay xidheen
Suuqii waynaa ee Ashawa.
Lama oga waxa dhaliyay rabshadahan,
balse waxaa ku dhaawacmay 3 qof oo Soomaali ah.
Guud ahaan Soomaalida deggan
magaalada Diridhabe ayay cabsi soo wajahday iyadoo Booliska magaaladu markay
dhibaato dhacdo ay Soomaalida un garaacaan oo ay dhib badan u gaystaan.
Rabshadahan ayaa ku soo hagaagaya
xilli magaalada ay joogeen madaxda degaanada bariga Itoobiya oo shir dhanka
Nabadgalyada ah halkaas uga socday.
Soomaalida ayaa rabshadan soo
noqnoqotay ku wareeray, waxayna maanta dadka Soomaaliyeed ee deggan Diridhabe u
ahayd maalin uga duwan maalmihii hore, iyadoo dadkuna uu badankii iska joogeen
guryahooda.
Magaalada ayaa saacaddan ah mid
deggan inkastoo aan la isku halayn karin, walaw ciidan fara badan ay joogaan
xaafadihii ay wax ka dhaceen haddana laguma kalsoonaan karo.
C/raxmaan Diini,
Hiiraan Online
[email protected]