Wasiirka Gaashaandhiga Somaliland oo ka hadlay sarkaal ciidanka Militariga Somaliland ka goostay
Talaado, August, 07, 2018 (HOL) -Wasiirka Gaashaandhiga Somaliland Eng: Ciise
Axmed Xawaare ayaa sheegay inay xoog ama xal kale ku soo afjari donaan
sarkaal ciidanka Militariga Somaliland ka goostay oo maamulka
Puntland waydiistay dhul uu ciidamo ku urursado.
Sarkaalkan oo magaciisa la yidhaahdo Siciid
Cawil Caare ayaa hadda ku sugan tuuladda Higlo oo 15 KM u jirta degmada Qardho,
waxaanu sheegay inuu dagaal la gali doonno Somaliland.
“Sarkaalkaasi ciidanka ka goostay
baryahanb waxaanu ku wadnay waanwaan, waxaana la hadalnay odayaashiisa,
sidaa darteed, si kasta oo hawshaas ku soo afjari karno qaranka way ka go’an
tahay in aanu soo afjarno ama xal ha lagu soo afjaro ama xoog”ayuu yidhi
wasiirka Gaashaandhiga Ciise Axmed.
Waxaanu intaas ku daray wasiirku “Ninkaasi
maadaama oo uu ciidanka ka falaagoobay waxaanu qaadanay in arrinkoodu ka madax
banaanaado beelihii lagu heshiisiinayey Ceel afweyn, hawshii beeluhu way
dhamaatay, wayna naga go’an tahay sida ugu dhakhsiyaha badan arrinkiisa
loo soo dhamaystiro:
Wasiirku waxa uu sheegay in uu sarkaalkaasi gacan
saar la leeyahay Puntland oo u ogolaatay in dhulkooda saldhig ka samaysto.
Taliye Siciid cawil Caare, ayaa isagu
sheegay inuu ka cadhooday in dagaaladii labada beelood ee Ceel-Afweyn dirirtu
ku dhexmartay ay xukuumaddu ka gaabisay,isla markaana uu arrintaasi ka
cadhooday, waxaanu sheegay inuu dagaal uu la gali doono Somaliland oo uu ka
bilaabi doono gobolka Sanaag, waxaanu cadeeyey inuu Puntland waydiistay saldhig
uu ciidanka ku urursado.
Barkhad-ladiif M. Cumar,
Hiiraan Online
[email protected]
Hargeysa, Somaliland.