Somaliland oo ka hadashay isbedelka ka Socda dawlad deegaanka Soomaalidda Itoobiya
Talaado, August, 07, 2018 (HOL)– Xukuumadda
Somaliland ayaa ka hadashay isbedelka ka socda Itoobiya iyo shaqaaqooyinkii ka
dhacay dawlad deegaanka Soomaalidda Itoobiya.
Wasiirka Arrimaha Dibada Somaliland Dr. Sacad
Cali Shire ayaa sheegay in Itoobiya iyo Somaliland isku xidhan yihiin oo ay isa
saameeyaan, isla markaana mid walba wixii ka dhaca ka kale saamayn.
“waxaanu xad la leenahay saddex wadan,
Soomaaliya, Jabuuti iyo Itoobiya oo xadka ugu dheer la leenahay, Itoobiya
siyaabo badan baynu iskugu xidhanahay dad baa inaga dhexeeya, xidhiidh ganacsi
baa inaga dhexeeya, mid amniga iyo siyaasadeena oo isku xidhan wax kasta oo ka
dhaca Samayn buu inagu leeyahay, isbedelka ka socda wadankaasi waanu soo
dhoweynaa waana mid salka ku haya dhawrista xuquuq aadanaha, furfurnaan iyo
dimuqraadiyad, waana tay aynu inagu qaadanay ee saldhiga inoo ah waana
isbedelka aynu soo dhoweynayno mar walba “ayuu yidhi wasiir Shire.
Waxa kale oo uu intaas ku daray “ wixii dhibaato
ee ka dhaca way ina saamaynaysaa, waan ka tacsiyadaynaynaa dadkii waxyeeladdu
ka soo gaadhay ee shaqaaqooyinkii maalmihii u dambeeyey ka dhacay dawlad
deegaanka Soomaalidda dadkii ay wax ka soo gaadheen, wixii kale ee inagaga
beegan ama baahi timaado kaalinteena ka qaadanaynaa”
Barkhad-ladiif M. Cumar, Hiiraan Online
[email protected]
Hargeysa, Somaliland.