Safiirka Ingiriiska ee Soomaaliya oo gaaray Kismaayo iyo xarun nabadsugidda lagu tababari doono oo la dhagaxdhigay [SAWIRRO]


Axad, September, 10, 2017 (HOL)-- Safiirka dowladda Ingiirska U fadhiya Soomaaliya David Concar oo saaka soo gaaray magaalada Kismaayo ayaa kulan la qaatay madaxda ugu sareeysa ee Jubaland oo ay ka wada hadleen arimo kala duwan oo quseeya amniga iyo horumarka.

Wafdiga ayaa markii uu soo gaaray garoonka waxaa halkaasi si diiran ugu soo dhaweeyay madaxweynaha Jubaland Mudane Axmed Max'ed Islaam, Ku xigeenkiisa 1-aad Mudane Max'uud Sayid Aadan iyo xubno ka tirsan golaha wasiirada Jubaland.

Masuuliyiintan ayaa gaaray goob loo asteeyay in laga dhiso xarun tababar oo ku taal nawaaxiga garoonka diyaaradaha Kismaayo, halkaa oo ay si wadajir ah uga dhagaxdhigeen dhismaha xarunta tababarka ciidamada nabadsugidda Jubaland.

Taliyaha nabadsugidda qaranka C/laahi Max'ed Cali (Sanboloolshe), Safiirka dowladda Ingiriiska ee Soomaaliya David Concar iyo Madaxweynaha Jubaland ayaa daahfuray dhismaha xarunta.

Intaa kadib, Safiirka ayaa kulamo gooni gooni ah la qaatay madaxda ugu sareeya Jubaland iyo ururrada bulshada rayidka ah ee Jubaland, ayagoo ka wada hadlay arimo kala duwan.

Kulamada markii ay soo idlaadeen waxaa warbaahinta la hadlay Madaxweyne ku xigeenka 1-aad ee Jubaland Mudane Max'uud Sayid Aadan, isagoo sheegay in safiirka ay ka wada hadleen arimo ay kamid yihiin amniga iyo horumarka.

Waxa uu sheegay in dowladda Ingiriiska ay ballan qaaday in ay ka caawin doonto dhinacyada mushaaraadka ciidamada iyo dhismaha wasaaradaha kala duwan ee dowlad goboleedka Jubaland.

Wafdiga ayaa intaa kadib dib uga ambabaxay garoonka diayaradaha magaalada Kismaayo, ayagoo dib ugu laabtay magaalada Muqdisho ee caasimadda dalka oo ay markii hore kasoo kicitimeen.

Xasan Nuur, Hiiraan Online
[email protected]
Kismaayo-Soomaaliya.

More News