AMISOM oo dib u dajin u sameysay Qoysaskii ku barakacay Fatahaadihii iyo Colaadihii ka dhacay Gobolka Shabeellada Dhexe
Isniin, December 16, 2013 (HOL) — AMISOM ayaa dib u dajin u sameysay boqolaal qoys oo ku barakacay fatahaaddii iyo colaadihii ka dhacay gobolka Shabeellada dhexe, sida uu sheegay sarkaalka ugu sarreeya ciidamada AMISOM ee ku sugan gobolka Shabeellada dhexe.
Qoysaskan oo tiradoodu tahay 920-qoys ayaa la dajiyay deegaanno dhinaca galbeed kaga began degmada Jowhar oo ay gacanta ku hayaan ciidamada AMISOM, waxaana qaar ka mid ah qoysaska ay sheegeen inay aad ugu faraxsan yihiin dib u dajinta loo sameeyay.
“Dib u dajin ayaan u sameynay qaar ka mid ah qoysaskii faratahaadaha iyo colaaddii Shabeellada dhexe ku barakacay, waxaana dajinnay tuulooyin aad u ammaan badan,” ayuu yiri Col. Isaaq oo ah madaxa AMISOM ee gobolka Shabeellada Dhexe.
Sarkaalkan oo la hadlayay idaacadda dowladda Soomaaliya ayaa sheegay in tallaabadan ay qayb ka tahay qorshayaal ay ku doonayaan inay dib ugu sameeyaan qoysaskii ku barakacay musiibooyinkii ka dhacay gobolka.
Mid ka mid ah qoysaska dib u dajinta loo sameeyay oo isaguna idaacadda la hadlay ayaa sheegay inay aad u wanaagsan yihiin ayna ku faraxsan yihiin in dib u dajin ay u sameyso AMISOM.
“Waxaan ahay qoysas ka barakacay fatahaadihii iyo colaadihii gobolka shabeellada hoose ka dhacay, xaaladdeennu markii hore aad ayay u liidatay, haddana aad ayay u wanaagsan tahay, waxaana halkan daggannahay dhowr casho,” ayuu yiri ruuxa la hadlay idaacadda.
Tallaabadan ayaa noqonaysa tii ugu horreysay oo dadkii ku barakacay colaadaha iyo fatahaadaha gobolka Shabeellada Dhexe loo sameeyo, kuwaasoo dagganaa deegaanno kala duwan oo gobolkaas ka tirsan.
Dhanka kale, sarkaalka u hadlay AMISOM ayaa sheegay inay horumarro ka sameeyeen dagaalladii ay kula jireen Al-shabaab ayna dhul ballaaran oo ka tirsan gobolka ka saareen, inkastoo uusan sheegin qorshayasha hadda uga dagsan deegaannada ay weli Al-shabaab gacanta ku hayso.
Maxamed Xaaji Xuseen, Hiiraan Online
[email protected]
Muqdisho, Soomaaliya