Ururka Midowga Afrika oo ka dalbaday Dowladda Koonfur Afrika inay ciidamo nabad ilaalin ah u dirto dalka Soomaaliya

Isniin, July 26, 2010 (HOL) - Ururka Midowga Afrika ayaa ka dalbaday dalka Koonfur Afrika inay ciidamo nabad ilaalin ah oo xoojiya kuwa AMISOM ee ,ku sugan Muqdisho ay u diraan Soomaaliya, waxaana warkan maanta oo Isniin ah shaaciyay Telefishinka Koonfur Afrika ee SABC.

Ciidamadan ayaa la sheegay inay qayb ka qaadan doonaan difaacidda Dowladda Soomaaliya oo dagaal kula jirta Xoogaga Islaamiyiinta ah ee ka horjeeda sida Xarrakatul Shabaab oo sidoo kale dagaal kula jirta ciidanka AMISOM ee Muqdisho ku sugan.

Ururka Midowga Afrika ayaa ku sheegay in ciidamada Koonfur Afrika la doonayo inay kordhiyaan ciidanka ka socda Burundi iyo Uganda ee ku sugan Muqdisho, kuwaasoo haatan ay tiradoodu tahay 6,000-askari, isla markaana gacanta ku haya goobaha muhimka ah sida Madaxtooyada Soomaaliya.

Madaxweynaha dalka Koonfur Afrika Jacob Zuma oo ka hadlay codsigan ayaa sheegay in dalkiisu uu diyaar u yahay inuu ka qaybgalo dadaal walba oo lagu dhameynayo colaadaha Soomaaliya, isagoo xusay in qaraxyadii ka dhacay Kampala ay ahaayeen kuwo caddeyn u ah khatarta soo socota.

Shirka Midowga Afrika ayaa la qorsheynayaa in lagu badalo howlgalka ciidamada AMISOM ee Muqdihso jooga, iyadoo codsigan lagu soo beegay xilli ay dalalka Midowga Afrika ka hadlayaan inay kordhiyaan ciidamada kaga sugan Soomaaliya si ay dagaal ula galaan Xarrakatul Shabaab.

Ciidamada AMISOM ee ku sugan Muqdisho oo maalin walba dagaal kala kulma Islaamiyiinta hubeysan ayaa waxay ka socdaan dalalka Burundi iyo Uganda, iyadoo dalal ay ka mid tahay Jabuuti ay sheegeen inay u dirayaan ciidamo dheeraad ah.

Maxamed Xaaji Xuseen, Hiiraan Online
[email protected]
Muqdisho, Soomaaliya