Ergadii soo dooratay xidhibaannada Federaalka oo looga digay in ay u hoggaansamaan awaamiirta Al-shabaab
Isniin, July, 22, 2019 (HOL)- Al-shabaab ayaa
maalmihii ugu danbeeyayba ku howlanaa in ay isugu yeeraan ergadii iyo
odayaashii dhaqanka ee ka qeyb-galay doorashada iyo soo xulistii xildhibaannada
Golaha Shacabka, iyaga oo ugu baaqaya in ay isugu yimaadaan deegaannada ay
maamulaan.
Balse saraakiisha hay’addaha Amaanka gobolka Gedo
oo arintan ka hadlay ayaa uga digay odayaasha dhaqanka iyo ergada intaba in ay
u hoggaansamaan awaamiirta Al-shabaab.
Aadan Siraad Maxamuud oo ah guddoomiye ku-xigeenka degmada
Garbahaarey ee gobolka Gedo ayaa sheegay in maamulkiisu tallaabo adag ka qaadi
doono sida uu hadalka u dhigay cid kasta oo u hoggaansanta awaamiirta Ururka
Al-shabaab.
Al-shabaab ayaa ku sheegay sababta ay ugu
yeerayaan ergada iyo odayaashii dhaqanka soo doortay xildhibaannada in laga
cafiyo sida ay hadalka u dhigeen qaladaadii ay horay u galleen.
Taliyaha Amniga degmada Garbahaareey Cabdi Xakiin
Maxamed Cumar ayaa dhinaciisa waxaa uu sheegay in Al-Shabaab xilligaan uu kala
dhaxeeyo dagaal xoogan,isla markaana odaygii ama shaqsi kasta ee la macaamila
ay la mid yihiin Al-shabaab maxkamadna ay la tiigsan doonaan.
Talaabadan oo kale waxaa qaaday oo u hoggaasamay
amarka ka soo baxay Al-shabaab odayaasha dhaqanka gobolka Hiiraan oo qaarkood
wali ku sugan deegaannada ay Al-shabaab ka maamulaan gobolka Hiiraan.
Dowladda Soomaaliya wali wax war ah kama aysan
soo saarin cadaadis Al-shabaab ay ku hayaan odyaasha dhaqanka iyo ergadii soo
dooratay xildhibaannada oo hadda qaarkood ku sugan deegaannada ay maamulaan Al-shabaab.
C/raxmaan Diini, Hiiraan Online
[email protected]
