Khamiis, April, 04, 2019 (HOL) - Iyadoo dhawaan maamulka gobolka Banaadir uu ku
dhawaaqay in mudo saddex bilood ah xaalad deg deg ah la galiyay magaalada
Muqdisho, ayuu taliska Booliiska Soomaaliyeed sheegay in la sii adkeynayo
amniga magaalada.
Magaalada ayaa u kala qeybsan
labo dhinac oo gaadiidka dadweynaha isaga kala gudbin karin, waxaana la arkayaa
ciidamo ka tirsan kuwa nabad-galyada oo Isgoys walba taagan islamarkaana hubinaya
baaritaanno dheeraad ahna ku sameynaya gaadiidka dadweynaha iyo kuwa
gaarka loo leeyahay.
Taliye ku xigeenka ciidanka Booliska Zakiya Xusseen
Axmed ayaa ugu baaqday shacabka in ay dulqaad muujiyaan inta ay socdaan sida ay
hadalka ku dhigtay howlgalada nabad-galyada lagu xaqiijinayo oo lagala kulmi karo ciriir dhinaca isku socodka ah.
Taliska Booliiska ayaa maalintii shalay soo
bandhigay muuqaalka ama sawirka gaari ay sheegeen in lagu soo raray walxaha
qarxa oo la doonayo in lagu dhibaateeyo Shacabka Muqdisho.
Ciidamo dheeraad ah ayaa la geeyay Wadooyinka magaalada
Muqdisho waxaana ka socda baaritaano kala duwan oo Ammaanka lagu xaqiijinaayo.
C/raxmaan Diini,
Hiiraan Online
[email protected]