Madaxweynaha Somaliland oo la kulmay weftigii UN-ta iyo IGAD oo ka wada hadleen arrinta Tuko-raq
Isniin, July, 30. 2018 (HOL) - Madaxweynaha
Somaliland, Mudane Muuse Biixi Cabdi, ayaa maanta xafiiskiisa kulan gaar ah
kula qaatay wefti ballaadhan oo ka kala socota Jimciyadda Quruumaha ka dhaxaysa
iyo urur-goboleedka IGAD.
weftigan oo ay kala hoggaaminayaan ku-xigeenka
ergayga gaarka ah ee xoghayaha guud ee qaramada midoobay u qaabilsan Somaliland
iyo Soomaaliya, Mr. Raisedon Zenenge iyo Ergeyga urur goboleedka IGAD u
qaabilsan arrimaha Somaliland iyo Somaaliya Amb Mohamed Ali Guyo, ayaa kulanka
ay madaxweynaha la qaateen waxa ku wehelinayey guddoomiyaha golaha wakiillada
Somaliland, Mudane Baashe Maxamed Faarax, guddoomiye-ku-xigeenka golaha
guurtida, Mudane Siciid Jaamac Cali iyo wasiirka arrimaha dibadda, Dr. Sacad
Cali Shire, waxaana diiradda lagu saarayo arrimo door ah salka ku haya sidii
loo dhawri lahaa deggenaanshaha deegaanka TUKARAQ ee bariga Somaliland oo uu
dhawaan ka dhacay iska hor-imaad u dhexeeya Ciidamo Somaliland iyo kuwo
Puntland.
“Madaxweynaha iyo wefdigu waxa ay ka
wada-hadleen ammuuro badan oo la xidhiidha cilaaqaadka labada geesood oo ay
kamid tahay xaaladda TUKA-RAQ sidii loo maarayn lahaa, sidii arrinkaas xal
looga gaadhi lahaana qodobbo dhawr ah ayaa la isla taataabtay, kuwaas oo ay
kamid tahay in xabbad-joojin la sameeyo marka hore, in maxaabiista la isu
celiyo iyo in hay’adaha samo-falka ah loo ogollaado inay gargaar fidiyaan, wax
badanna waa la isla qaatay, waxaana aan rajaynaynaa in geeddi-socodka
wada-hadalkaas guul laga gaadhi doono insha Allah.”ayuu yidhi Sacad Shire.
Sidoo kale, waxa iyaguna halkaasi ka hadlay
weftiga UN-ta iyo IGAD ka socday oo sheegay inay is arkeen xildhibaanada labada
gole Baarlamaan, ururadda bulshadda, xisbiyadda qaranka, wasiirka Arrimaha
Dibadda iyo maanta oo ay la kulmeen madaxweynaha, waxaanay sheegeen inay ka
wada hadleen sidii arrimaha Tuko-raq nabad loogu soo dabaali lahaa oo xabad
joojin loo samayn lahaa, in maxaabiista la isku wareejiyo, in deegaanadda la
gaadhsiiyo caawimadda iyo arimo la mid ah.
Barkhad-ladiif M. Cumar, Hiiraan Online
[email protected]
Hargeysa, Somaliland.