Isniin, July, 30, 2018 (HOL)– Xarunta Jaamacadda Banaadir
ee magaalada Muqdisho ayaa waxaa furmay seminaar socon doona labo cisho oo ku
saabsan Cilmiga Raajada ka bilaabay Prof/Dr. Xasan Maxamed Xasan oo ka mid ah
aqoonyahanada Soomaaliyeed ee sida weyn looga tixgeliyo dalka iyo dibeda.
Prof. Xassan oo dhowaan ku soo laabtay dalka oo uu muddo
dheer ka maqnaa ayaa ka howlgala Isbitaalo ku yaalla dalalka khaliijka, isagoo
ku taqasusay Cilmiga Raajada (MD, Radiology Consultant).
Casharka uu Prof. Xasan Maxamed Xassan ka bixiyey
Jaamacada Banaadir oo ahaa mid kooban hasse ahaatee xambaarsanaa aqoon balaaran
ayaa wuxuu si faahfaahsan uga hadlay mowduuca ku saabsanaa raajada casriga ah,
qalabka loo adeegsado, habka loo akhriyo dhibaatooyinka uu jirka iyo lafaha ka
qabo Bnukaanka raajada iyo macluumaad kale.
Waxaa furitaankaas ka qeyb galay masuuliyiinta jaamacada
Banaadir iyo qaar ka mid ah ardayda wax ka barata jaamacadaas gaar ahaan kuwa
hadda dhigta kuliyadda Caafimaadka iyadoo Prof-ku sharaxaad ka bixiyey Casharka
la xiriiray Raajada iyo hababka loo isticmaalo, isagoo qaar ka mid ah ardayda
Jaamacada Banaadir uga jawaabay su’aalo ku saabsan mowduucan oo ahaa mid
ardayda xiise geliyey.
Gudoomiyaha Jaamacada Banaadir Dr. C/risaaq Axmed Dalmar
oo munaasabadan furitaanka seminaarkan hadal kooban ka jeediyey ayaa uga mahad
celiyey Prof/Dr. Xasan Maxamed Xassan casharka qiimaha badan ee uu ka bixiyey
jaamacada oo uu xusay inuu wax weyn ku kordhinayo aqoonta ardaydii iyo
aqoonyahanadii kale ee ka faaiideystay.
“Waxaan aad ugu faraxsanahay inaan ka soo qeyb galo
furitaanka seminaarkan nuxur ballaaran xambaarsan ee uu halkan ku qabanayo
Prof/Dr. Xasan Maxamed Xassan oo ah aqoonyahan Soomaaliyeed oo ku taqasusay
cilmiga raajada” ayuu intaa ku daray gudoomiyaha.
Dr. C/risaaq Axmed Dalmar ayaa sheegay in Prof. Xasan
Maxamed Xassan oo dhowaan dalka dib ugu soo laabtay uu doortay inuu casharkiisa
ugu horeeya ka bixiyo jaamacada Banaadir, isagoo xusay iney ku faraxsan yihiin
ugana mahad celinayaan.
Waxaa uu intaa ku daray Dr. Dalmar in jaamacada Banaadir
ay tahay Jaamacad balaaran oo ay ku midoobeen aqoonyanadii wax ku soo bartay
jaamacadii umadda, ayna aasaaseen aqoonyahano ujeeddadoodu tahay in la
horumariyo aqoonta, isagoo xusay iney dhigtaan arday gaareysa kumanaan oo u
kala qeybsan 12 kuliyadood, Kumanaan Kalena horey uga qelin jebiyeen.
Waxaa sidoo kale munaasabadaas ka hadlay hormuudka
kuliyadda Caafimaadka ee Jaamacadda Banaadir Dr. Maxamed Maxamuud Biday oo ka
waramay faa'iidada ay seminaarada noocan ah ee ay bixiyaan khabiirada u
leeyihiin ardayda.
“Dhegeysiga casharada noocan ah waa kuwo aad u qiime
badan oo heer caalami ah, waxa loo tagaa dibedaha, qarash baa ku baxa hotelaa
loo kireystaa, waxayna taas ku tusinaysaa muhiimada ay leeyihiin si looga
faaiideysto aqoonyahano sare sida Prof. Xasan Maxamed Xassan oo kale, waana uga
mahadcelineynaa isaga iyo gudoomiyaha Jaamacada Dr. Dalmar oo isna had iyo jeer
isku howla sidii aqoonta ardayda wax ka barata jaamacada ay ula jaanqaadi
laheyd mida casriga ah” ayuu yiri Dr. Biday oo ardayda nasiibku u saamaxay ugu
baaqay iney ka faaideystaan aqoonta uu xambaarsan yahay seminaarkan.
Waxaa munaasabadan goob joog ka ahaa Prof. Axmed Yuusuf
Guuleed oo ka tirsan Muasasada Jaamacadda Benaadir, hormuudka arrimaha ardayda
ee Jaamacadda Raage Maxamaed Shahiid, Aoonyahano, iyo xubno kale.
Seminaarkan ayaa qeyb ka ah seminaarada xiliga fasaxa
(Summer Seminars) ee Jaamacadda Banaadir u qabato ardayda si aqoontooda sare
loogu qaado.
C/raxmaan
Diini, Hiiraan Online
[email protected]