Axad, Janaayo, 07, 2018 (HOL) - Madaxweynaha Soomaaliya Maxamed Cabdullaahi Farmaajo iyo wafdi uu
horkacayo ayaa maanta ku sii jeeda magaalada Garoowe ee xarunta dowlad
gobolleedka Puntland.
Booqashada
madaxweynaha ee Puntland ayaa noqoneysa tii ugu horeysay tan iyo markii loo
doortay xilka madaxweynaha 08 February ee sanadkii tagay 2017.
Ujeedada ugu weyn
ee safarka madaxweynaha uu maanta ku tagayo Garoowe ayaa lagu sheegay ka
qeybgalka furitaanka Garoonka cusub ee diyaaradaha magaalada Garoowe,sidoo kalana waxaa uu booqan doonaa
deegaanno kala duwan oo ka tirsan Puntland.
Warar soo baxayaa ayaa sheegaya in safarka Puntland
kaddib la filayo in madaxweynaha uu u soo gudbo dhinaca deegaannada Galmudug ,
gaar ahaan magaalooyinka Cadaado iyo Dhuusamareeb.
Safarka
madaxweynaha ayaa noqonaya socdaalkii ugu balaarnaa ee uu ku maro gobalada
Dalka Soomaaliya haddii uu u dhaco sida loo qorsheeyay, waxaa uu sidoo kale qaadan doonaa maalmo ku dhaw todobaad
sida laga soo xigtay saraakiil ka tirsan madaxtooyada Soomaaliya.
C/raxmaan Diini, Hiiraan Online
[email protected]
.