Maleeshiyaad ku dagaalamay deegaanno dhaca xadka gobollada Hiiraan iyo Galguduud
Sabti, December, 22, 2018 (HOL) – In ka badan 15
ruux ayaa lagu waramayaa in ay ku dhinteen dagaal culus oo saacadihii ugu
danbeeyay labo maleeshiyo beelleed ku dhaxmaray deegaan dhaca xadka labada gobol Hiiraan iyo Galguduud.
Guddoomiyaha degmada Maxaas Maxamed Cabdi Cawaale
oo VOA uga waramay warka ku saabsan dagaalkan ayaa sheegay in uu ka dhacay
deegaanno lagu magacaabo Ceel-Baraf, Ceel Jiqow, iyo Agagaarka War-dhuumala leh,
‘’Dagaalku wuxuu dhaxmaray dad markii hore-ba isku
soo guuray oo soo naq raacay oo qaarkood ku yimid dhinaca gobolka Galguduud iyo
dadkii deegaanka ee loo yimid ayuu dagaalku dhaxmaray, Aanooyin hore oo
Qabiil-na wey iska jireen, sidaa daraadeed ayuu dagaalku u qarxay’’ ayuu yiri
guddoomiyaha.
Guddoomiye Cawaale ayaa intaa ku daray in
waayadii ugu danbeeyayba xaalada deegaanku aheyd mid deggan hasse ahaatee
dagaalkan danbe uu ku qarxay si lama filaan.
‘’Khasaaraha inta aan ognahay marka la eego
baaxada uu dagaalku lahaa waxaan naloo sheegay 15 dhimasho ah, dhaawacuna wuxuu
ka badan 30 ayuu hadalkiis sii raaciyay guddoomiyaha.
Wuxuu sheegay in ilaa iyo hadda aysan jirin wax
waan waan ah oo lagu joojinayo dagaalka, madaama labada dhinac xalay uu gabalku
isugu dhacay.
Ma’aha markii ugu horeysay oo labadan maleeshiyo
beelleed ku dagaalamaan deegaannadaas, waxaana marar badan oo horey lagu
guuldareystay wadahadallo la doonayo in lagu dhameeyo colaada labada dhinac.
C/raxmaan Diini, Hiiraan Online
[email protected]
