Garaad Maxamed Xirsi oo lagu caleemo saaray Deegaanka Qararro ee gobolka Wardheer
Sabti, December, 22, 2018 (HOL) – Garaad
Maxamed Xirsi Ducaale ayaa lagu caleemo saaray deegaanka Qararo oo ka
tirsan Degmada Dannood ee gobolka Doollo (Wardheer) ee dawlad
deegaanka Soomaalida Itoobiya.
Munaasibada caano shubka waxa ka soo
qaybgallay madax dhaqameed , waxgarad iyo shacab faro badan oo ka kala
yimid deegaanadda Soomaaliddu degto, kuwaas oo garaadka cusub kula
dardaarmay inuu ummada soomaaliyeed ee loo doortay cadaalad ugu shaqeeyo.
ka hor intaanay Xafladu bilaabmin, ayaa waxa
Garaadka cusub si rasmiya ugu caano Shubay, Isimada iyo Cuqaasha Madasha ku sugnayd,
kuwaasoo ugu duceeyey in alle Masuuliyada-dhaqan ee fuushay u fududeeyo.
Caano-shubka kaddib, waxa halkaasi khudbado ka
kala duwna ka jeediyey Madaxdhaqameedyada, Siyaasiyiin, Masuuliyiin dawladdeed,
cuqaal iyo Waxgarad.
Ugu horayn, waxa madasha ka hadlay
Guddoomiyaha deegaanka Qararo Maxamed Maxamuud Jaamac iyo Caaqil Xarriir
Aw Cali Barre oo kamida Cuqaasha Beesha uu ka soo jeedo Isinku cusub ee lagu
caano shubay oo halkaa ka jeediyey kelmado isugu jira Mahad-naq iyo soo
dhaweyn.
Waxa kale oo iyaguna halkaa hadallo ku taxaluqa
dardaaran iyo duco ka jeediyey cuqaal iyo Waxgarad kamida Marti-sharafta
munaasibadaas ku sugnaa.
La-taliyaha Madaxweynaha Somaliland ee Arrimaha
Maamulka iyo Amniga Badda Cabdi Xirsi Ducaale oo ka mid ahaa Madaxda ka
qaybgashay xaflada, ayaa garaadka cusub ku dardaaray inay dadku u
sinaadeen kii kahor yimid iyo kii taageerayba uu oday u wada noqdo.
Gebagabadii waxa Xafladan khudbado isugu jira,
Bogaadin, Baraarujin iyo kaftan ka jeediyey Hogaan-dhaqameedyada Munaasibada ku
sugnaa, oo ay kamid yihiin Suldaan Cabdiqani Cismaan, Suldaan Maxamed Aw
Cali Jaban, Suldaan Mowliid Suldaan Axmed Xaaji Cali Baalle,
Suldaan Xasan Bayaxow iyo xubno kale oo madaxdhaqamedyo ah.
Gabagabadii waxa halkaasi kelmado kooban oo
mahad-naq u badan ka jeediyey Garaad Maxamed Xirsi Ducaale oo dadweynihii ka
soo qaybgallay caleemasaarkiisa u mahad celiyey.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
