Jimco, September,01, 2017 (HOL) –Ugu yaraan shan askari ayaa ku geeriyooday qarax maanta ka dhacay deegaanka Af-urur oo ku dhow-Gal-gala , isla markaana kamid ah goobo dhawaan laga saaray ururka Al-shabaab ee ku sugan buuralayda gobolka Bari.
Dad lagu qiyaasay afartameeyo qof oo kale ayaa la sheegay in ay ku dhaawacmeen weerarkan oo ahaa mid ka dhacay bal-balo ku taala tuulada oo inta badan ay askartu ku kulmaan si ay qaybsadaan qaadka.
Qarax labaad ayaa la sheegay in sidoo kale la maqlay ka dib markii ciidamada Puntland ay u soo gurmadeen dadkii ku waxyeeloobay qaraxii hore ,taasi oo keentay in khasaaraha uu ka sii bato intii hore. Saraakiisha ciidamada Puntland oo aan xiriir la samaynay ayaa ka gaabsaday in ay faah-faahin ka bixiyaan weerarkan oo imaanaya xilli ciidamo dheeri ah lagu kordhiyay ciidamada ku sugan buuraha Gal-gala
Ma jirto cid sheegatay mas'uuliyad-da weerarkan balse ururka Al-shabaab oo saldhigyo ku leh buuralayda Golis ayaa inta badan fuliya weerarro ka dhan ah ciidamada Puntland ee ku sugan aaga Gal-Gala. Hiiraan Online News Desk