Madaxweynaha Itoobiya oo u Hambalyeeyay Madaxweynaha Soomaaliya ee dhawaan la doortay Xasan Sheekh Maxamuud

Arbaco, September 12, 2012 (HOL) — Madaxweynaha dalka Itoobiya, Girma Wolde-Giorgis ayaa u hambalyeeyay madaxweynaha cusub ee Soomaaliya oo lagu doortay kulan ka dhacay Muqdisho maalintii Isniinta ahayd ee lasoo dhaafay.

Girma oo sheegay inuu aad ugu faraxsan yahay in madaxweyne si xor lagu soo doortay uu hoggaamiyo Soomaaliya uuna haddana Soomaalida ugu hambalyeynayo doorashadaas, isagoo sheegay in doorashadan ay soo celin doonto rajadii shacabka Sooamalida.

"Anigoo ku hadlaya magaca dadka iyo dowladda Itoobiya waxaan u hambaleynayaa madaxweynaha ay baarlamaanka Soomaaliya doorteen, Xasan Sheekh Maxamuud," ayuu yiri Girma oo sheegay in Itoobiya ay kala shaqeyn doonto dowladda Somalia sidii looga gudbi lahaa caqabadaha jira.

Madaxweynaha Soomaaliya ayaa lagu doortay kulan ka dhacay Muqdisho maalintii Isniinta ahayd ee lasoo dhaafay, isagoo kaga adkaaday wareeggii ugu dambeeyay madaxweynihii hore ee Soomaaliya, Shariif Sheekh Axmed oo sheegay inuu natiijada soo baxday ku qanacsan yahay.

Ra'iisul wasaaraha dalka Itoobiya, Haile Mariam Disaleng ayaa isaguna sheegay inuu soo dhaweynayo doorashada madaxweynaha cusub ee Soomaaliya, wuxuuna ku tilmaamay doorashadii uu kusoo baxay Xasan Sheekh mid u dhacday si xorriyad ah.

Xukuumadda Itoobiya ayaa waxay saaxiibbo dhow la ahayd madaxda dowladihii soo maray Soomaaliya, inkastoo aan la ogeyn inta uu le'ekaan doono xiriirka dhexmara iyaga iyo dowladda cusub ee Soomaaliya oo uu hoggaaminayo Xasan Sheekh Maxamuud.

Dowladda Itoobiya ayaa waxaa Soomaaliya kaga sugan kumannaan askari oo gacan ka siinaya ciidamada dowladda dagaalka ay kula jiraan xoogagga Al-shabaab oo weli ka taliya dhul ballaaran oo ku yaalla bartamaha iyo koonfurta Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya