Qaraxyo ay Mas'uuliyadooda sheegatay Al-shabaab oo lagu weeraray Hoteel uu Muqdisho ka deggen yahay Madaxweynaha Soomaaliya
Arbaco, September 12, 2012 (HOL) — Ugu yaraan sagaal qof ayaa ku dhintay, tobaneeyo kalena way ku dhinteen laba qarax oo waaweyn oo ka dhacay hoteelka Jaziira oo uu daggan yahay madaxweynaha cusub ee Soomaaliya oo ku yaalla agagaarka garoonka diyaaradaha ee Muqdisho, waxaana dadka dhintay ku dhintay ka mid ah askar ka tirsan ciidamada AMISOM, kuwa Soomaaliya iyo kooxihii weerarka fuliyay.
Xilligii ay qaraxyadu dhacayeen ayaa waxaa hoteelka ka socday shir ay lahaayeen madaxweynaha cusub ee Soomaaliya iyo wafdi ka socday wasaaradda arrimaha dibadda ee Kenya oo uu hoggaaminayay wasiirka arrimaha dibadda ee Kenya, Sam Ongeri, wafdi ka socday Midowga Afrika iyo ra'iisul wasaarihii hore ee Soomaaliya, C/weli Maxamed Cali.
"Qaraxyadu waxay ahaayeen laba qarax oo waaweyn, waxaana fuliyay laba qof oo waxyaabaha qarxa isku soo xiray kuna labisnaa dharka ciidamada dowladda, waxaana goobta ku dhintay shan askari oo laba ka mid ah ay ahaayeen ciidamada AMISOM iyo saddex sakari oo Soomaali ah," ayuu yiri goobjooge hoteelka ku sugnaa oo la hadlay HOL.
Ciidammada dowladda Soomaaliya iyo kuwa AMISOM ayaa xiray hoteelka iyo agagaarkiisa, waxaana ay qaraxyadu dhaceen iyadoo uu hadlayay madaxweyaha cusub ee Soomaaliya, Xasan Sheekh Maxamuud inkastoo aysan jirin wax khasaare ah oo soo gaaray isaga iyo wafdigii hoteelka ku sugnaa.
Rasaas badan oo ay ciidamada dowladda fureen qaraxyada kaddib ayaa waxaa ku dhintay laba qof oo mid ka mid ah la sheegay inuu ka mid ahaa raggii weerarka fuliyay iyo qof kale oo rayid ah, sidoo kale
Dhaawacyada ayaa waxaa ku jiray saddex askarta AMSIOM ka tisan iyo ciidammo kale oo Soomaali ah, waxaana sidoo kale ku dhaawacmay dad shacab oo qaarkood ku jiray gudaha hoteelka, halka kuwo kalena ay ku sugnaayeen dibadda hoteelka.
Xarakada Al-shabaab ayaa sheegatay inay mas'uul ka tahay weerarradan iyadoo sheegtay inay la heleen halkii ay bartilmaameedsanayeen, balse ma aysan sheegin khasaare ay ku geysteen, waxaana bayaan ay soo saareen ku sheegeen inaysan aqoonsanayn madaxweynaha cusub ee Soomaaliya, Xasan Sheekh Maxamuud.
Madaxweynaha cusub ee Soomaaliya ayaa la doortay laba maalmood kaddib, isagoo wareeggii ugu dambeeyay ee doorashada kaga guuleystay madaxweynihii hore ee Soomaaliya, Shariif Sheekh Axmed oo weli ku sugan Muqdisho.
Maxamed Xaaji Xuseen, Hiiraan Online
[email protected]Muqdisho, Soomaaliya
