Maxkamadda Gobolka Bari ee Puntland oo dil toogasho ah ku xukuntay Nin Saaxiibkiis Dilay Kaddibna Meydkiisa Jar-jaray

Arbaco, November 07, 2012 (HOL) — Maxkamadda derejada 1-aad ee gobolka Bari, laanteeda magaalada Boosaaso ayaa maanta xukun ku riddey nin shalay si arxan darro ah mid kale xaafadda Biyo-kulule ugu diley.

Xeer ilaaliyaha maxkamadda Bashiir Ismaaciil Axmed, ayaa markii uu xukunku dhacay kadib warbaahinta la hadlay, wuxuuna sheegay in eedeysanahan oo lagu magacaabo Cabdisamed Xuseen Xaaji Yuusuf (Dhicis) ay isla shalay ciidamada Boolisku falkaas usoo qabteen.

Wuxuuna intaas ku daray in uu si cad maxkamadda horteeda uga qirtey in uu isagu yahay qofka diley Abaadir Iimaan Axmed (Ilko-case) oo ay saaxiibo ahaayeen, islamarkaana ay maxkamaddu ku xukuntay dil toogasho ah.

Sababta xukunkan loosoo dedejiyey ayuu ku sheegay in ay tahay si looga hortago in lagu dhiirado falka noocan oo kale ah, maadaama uu yahay mid si weyn looga argagaxay, kuna cusbaa dhegaha bulshada.

Ninka xukunka lagu ridey ayaa dhankiisa mar wax laga weydiiyey sababta uu saaxiibkiis u diley iyo weliba waxa ku kalifay in uu meydkiisa  jar-jaro sheegay, in ay murmeen iyaga oo sarkhaansan xilli ay maandooriye isticmaalayeen.

" Waan cabsaneyn, kadibna ninka waan muranay, waan xanaaqay oo toorey ayaan dhuunta ka geliyey, kadibna waxan garan waayey si aan yeelo, waxan ku fekeray in aan meydkiisa jar-jaro si aan u qariyo oo aan loo arkin" Gacan ku-dhiiglaha dilka geystey ayaa yiri.

Shalay ayey ahayd markii meydka qof jar-jaran lagu arkay kaamka barakacayaasha Buulo-mingis ee bariga magaalada Boosaaso, waxaana arintaas si weyn uga argagaxay bulshada ku dhaqan magaalada Boosaaso iyo guud ahaan Puntland.

Maxamed Salaad Xaaji Dirir, Hiiraan Online
[email protected]
Puntland, Soomaaliya