Talaado, January 12, 2010(HOL): Afhayeenka culummada
Ahlusunna Wal-jamaaca Sheekh C/llaahi C/raxmaan Abuu-Yuusuf (Al-Qaadi) oo
maanta shir jaraa'id ku qabtay Gobolka Galguduud ayaa sheegay in Sheekh Axmed
Madoobe uu kusoo biiray ururkooda.
"Sheekh Axmed Madoobe wuu ku qanci waayay kooxdii uu ka
tirsanaa ee Xisbul Islaam, wuxuuna ka doortay inuu kusoo biiro dhankeena,
isagoo diyaar u ah inuu sii wado dagaalada uu kaga horjeedo Xarrakatul
Shabaab" ayuu yiri Abuu-Yuusuf.
Afhayeenka Ahlusunna ayaa sidoo kale sheegay in Sheekh Axmed
Madoobe uu ku sugan yahay qaybo ka tirsan Gobolka Jubbada hoose uuna isku
diyaariyay inuu dagaal adag la galo kooxda halkaas ka qabsatay sannadkii hore
si uu uga qabsado.
"Kooxda Xisbul Islaam waxay noqotay mid u adeegta
Al-shabaab, sidaa daraadeed wuu ku adkeysan waayay damiir ahaan Sheekh Axmed
Madoobe inuu kasii mid ahaado, waana sababaha ugu waaweyn ee keenay inay
dhankooda kusoo biiraan" ayuu mar kale yiri Afhayeenka Ahlusunna.
Sheekh Axmed Madoobe ayaa ka mid ahaa saraakiishii Xisbul Islaam ee dagaalka kula galay Xarrakatul Shabaab Gobolka Jubbada hoose, kaddib markii labada dhinac ay isku maandhaafeen maamulka Magaalada Kismaayo.
Ma jiraan weli warar kasoo baxay Sheekh Axmed Madoobe oo
sheegaya inuu ku biiray Culummada Ahlusunna uuna ka baxay Xisbul Islaam,
waxaana uu ku sugnaa markii ugu dambeysay gudaha dalka
Maxamed Xaaji Xuseen, Hiiraan Online
Muqdisho, Soomaaliya