Khamiis, September. 20, 2018 (HOL)- Saacadihii ugu
danbeeyay baraha bulshada kuwada xiriiraan waxaa siweyn u qabsaday muuqaalo ku
saabsan weerar iyo bur burin ba’an oo ay dadka ku hayaan Tarmuuska Shaaha lagu
shubto, kaddib markii ay soo baxeen warar sheegaya in uu ku dhax- jiro kaniin la
sheegay in laga qaadayo cudurka Kansarka.
Qoysaska qaar ayaa markii ay maqleen warkan durbaba ku qamaamay
Tarmuus-yadii guryaha u yaallay, iyaga oo ka baaraya kaniinka la sheegay in uu ku
dhax-qarsoon yahay laakiin dhamaan Tarumuus-yadu waxaa ay ka sinnaayeen in laga
dhax-helay aalad yar oo u sameysan sidii kaniiniga oo kale laakiin lagu sheegay
in ay tahay mid ka ilaalineysa dhalada ku jirta Tarmuuska si
aysan qarax u sameyn marka lagu shubo shaaha oo ah biyo kulul.
Dadkan oo qaarkood la hadlay
warbaahinta ayaa sheegay in arintan shaki weyn ka qabaan islamarkaana wixii
hadda ka danbeeya adeegsan doonaan oo kaliya Jalmada lagu kariyo Shaaha oo
sida ay sheegeen uga maarmi doonaan isticmalka Tarmuus-ka.
Laakiin isla qaar kale oo
bulshada ka tirsan oo la hadlay Hiiraan Online ayaa sheegay in arintani u
muuqato mid waali ah oo aan waxba ka jirin, iyaga oo ku sababey-naya in dhamaan
Tarmuusyadii la jabiyay laga helay hal maado oo isku mid ah taasoo muujineysa in ay tahay mid la socta farsamada Tarmuus-ku u sameysan yahay.
‘’Arrintan waxaan u arkaa mid
waali ah, waayo haddii ay waxani Kaniini yihiin, maxaa Tarmuus-yada oo dhan ka
simay, oo xitaa loo arki waayay qaar aysan ku jirin, taa waxaa ay kuu cadeyneysaa in ay tahay aalada qeyb ka
ah farsamada Tarmuusku u sameysan yahay’’ ayuu yiri qof la hadlay Hiiraan
Online.
Ma’aha oo kaliya gudaha dalka
Soomaaliya ee xitaa sheekada ku saabsan bur-burinta Tarmuus-yada ayaa gaartay
wadamada dariska ah gaar ahaan deegaannada ay Soomaalidu ku dhaqan yihiin sida
magaalada Gaarisa oo ay dadku burburinayaa Tarmuus-yadii u yiilay guryaha maqaayadaha .
Ilaa iyo hadda ma jiro wax war ah
oo ay wasaarradda caafimaadka dowladda Soomaaliya ka soo saartay warka ku
saabsan bal uu jiro Kaniin ku dhax qarsoon gudaha Tarmuuska sida ay dad badanni
ku andacoonayaan.
C/raxmaan Diini, Hiiraan
Online
[email protected]
