Somaliland oo dib u qiimayn ku samaynaysa hay’adaha caalamiga iyo UN-ta ka hawlgalla wadanka
Khamiis, November, 01, 2018 (HOL)
– Shirkii golaha
wasiiradda Somaliland ayaa maanta lagaga dooday wada shaqaynta hay’adaha
UN-ta iyo kuwoo caalamiga ah ee ka hawlgalla Somaliland, taas oo la isla qaatay
in dib u eegis lagu sameeyo habka iyo hannaanka ay haya’adahaasi uga hawlgalaan
Somaliland.
Afhayeenka madaxweynaha Maxamuud Warsame
Jaamac oo war-saxaafadeed ka soo saaray qodobada shirkaasi lagaga
hadlayey oo ahaa wada shaqaynta hay’adaha caalamiga ah iyo UN-ta , waxa
kale oo lagu soo hadal qaaday sidii dadka loogu dhiirigalin lahaa iska wax u
qabsadda ee la xidhiidha adeegyada arrimaha bulshada la xidhiidhha.
“Kal-fadhigii 24-aad ee golaha wasiirradda
Somaliland, oo uu shir gudoominayey Madaxweynaha Somaliland, Mudane Muuse Biixi
Cabdi, oo uu ku wehelinayey madaxweyne ku xigeenka Somaliland, Mudane
Cabdiraxmaan Cabdilaahi Ismaaciil (Saylici) ayaa maanta oo ay taariikhdu tahay
01/11/2018, waxa lagu lafo-guray hannaanka wada-shaqayneed ee hay’adaha
qaramada midoobay (UN), kuwa caalamiga ah iyo xukuumadda Somaliland, waxaanu
goluhu warbixinta amniga ka dhegaystay wasiirka arrimaha gudaha
Somaliland.”ayaa yidhi afhayeenka madaxtooyada Warsame.
Waxa kale oo uu intaas ku daray “Goluhu waxay
dood-dheer ka yeesheen wada shaqaynta hay’adaha UN-ta, iyo kuwa caalamiga ah,
ee ka hawl-gala Somaliland, waxaanay isla qaateen in dib u eegis iyo qiimayn
buuxda lagu sameeyo habka iyo hannaanka ay hay’adahaasi uga hawl-galaan dalka
Somaliland, iyadoo loo marayo sharciga iyo dastuurka Somaliland.”
Sidoo kale, golaha wasiirraddu iyagoo ka duulaya
horumarinta iyo iskaashiga shacabka waxay ku dhiirigelinayaan bulshada
Somaliland, hirgelinta, barmaamijyada iskaa wax u qabso ee kobcinaya adeegyada
arrimaha bulshada la xidhiidha ayaa lagu yidhi war-saxaafadeedkaasi uu ku
saxeexnaa afhayeenka madaxtooyadu.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
