In ka badan 7 sano kaddib shacabka Muqdisho oo maanta loo fasaxay in ay gudaha u galaan garoonka Stadium Muqdisho
Talaado, August, 28, 2018 (HOL)– Shacab-ka reer
Muqdisho ayaa farxan iyo reereyn-reyn ku soo dhaweeyay in 7 sano kaddib maanta
mar kale u suurtgashay in ay gudaha u gali karaan garoonka Stadium Muqdisho oo
ka soo wareegay gacanta ciidamada howlgalka midowga Africa AMISOM.
Garoon-ka waxaa maalintii shalay tagay oo kala
wareegay madaxweynaha dowladda Soomaaliya Maxamed Cabdullaahi Farmaajo oo
dhinaca kalana ku soo wareegay qeybaha uu garoonka ka kooban yahay.
Ciidamo ka tirsan Booliiska Soomaaliya oo bar bar
socdaan shacabka isaga kala yimid qeybaha kal duwan ee Muqdisho ayaa gudaha u
galay garoonka maanta, iyadoo la arkayay Baantada Muuskida ee ciidamada Booliiska
oo ku dabaal-degaya gudaha garoonka.
Wasiirka dhalinyarada Khadiijo Maxamed Diiriye
ayaa warbaahinta dowladda u sheegtay "Dowlada waxay diyaar u tahay
dayactirkiisa, bilicdiisa iyo dhismahiisa, goordhow waa la howl bilaabayaa,
kuligeen waan bishaareysaneynaa, Ciidanka Booliska Jamhuuriyada ayaa la
wareegaya si loo sugo amnigiisa iyo Nadaafadiisa".
Garoonka waxaa la dhisay sanadkii 1978-dii, waxaana dhisay dowladda China,
iyada oo maal-galinta oo dhinaca kale
xiriir dhaw la heyd waagaa dowladdii hanti wadaagga ee Jeneraal Maxamed Siyaad
Barre.
Marka laga soo tago magaca Stadium Muqdisho garoonka waxaa lagu naaneysaa Tuullada
Cayaaraha, taasoo uu ku muteystay baaxda dhulka uu ku fadhiyo iyo qeybaha uu ku
kooban yahay.
Inkastoo AMISOM ay
hadda isaga baxeen gabi ahaan-ba garoonka hadda xaalkiisu wali fari-ka qodna oo
uu waxaa uu la idran yahay dayacii mudadda dheer soo maray, isaga oo u baahan
dib u dayactir aad u ballaaran oo aysan ku filneyn dowladda federaalka oo
kaliya.
C/raxmaan Diini, Hiiraan
Online
[email protected]