Talaado, August, 28,
2018 (HOL)– Iyadoo maalintii shalay xabsiga loo taxaabay madaxweynihii hore ee
dowlad deegaan-ka Soomaalida Itoobiya Cabdi Maxamuud Cumar, ayaa waxaa arintaa
markii-ba si deg deg ah uga jawaabtay hay’adda Xuquqda Aadanaha ee Human Rights
Watch oo soo dhaweysay xariggiisa.
"Waxaan rajeynayaa, in xarigga Cabdi
Maxamuud Cumar uu bilow u noqdo cadaallad u raadinta dhibanayaasha iyo dembiyada culus ee ka jira gobolka
Soomaalida ee Itoobiya, waxaa in ay madaxda federaalku hubiyaan in maxkamdeyntu noqonto mid
hufan, marqaati furayaasha-na awood u heli karaan iyaga oo aan cabsan n ay ka
hadlaan gafafkii dhacay’’ ayuu yiri lagu yiri warbixin ay soo saartay hay’adda.
Hay’adda ayaa horay
Cabdi Maxamuud Cumar iyo saraakiisha ciidamada Liyuu Booliiska ee gobolka ku eedeysay
in ay ku kaceen gabood falo ka dhan ah Xuquuqda Aadanaha, waxaana ay ka
codsatay dowladda dhexe ee Itoobiya in arintaa tallaabo deg deg ah laga qaado.
Ra’iisal wasaaraha Itoobiya ayaa dhankiisa sheegay in uu rumeysan yahay in masuuliyiintii hore ee DDSI iyo ciidamada
ay dil iyo jirdil u gaysteen dad rayid
ah, midaasina lagula xisaabtamayo, cadaaladana loo horkeeni doono.
Cabdi Maxamuud Cumar ayaa xiriir weyn iyo
gacan-saar dhaw-ba la lahaa xukuumaddihii hore ee
Itoobiya, hasse ahaatee waxaa muuqatay in uu la jaan-qaadi waayay maamulka cusub ee uu hormuudka ka yahay Abiy Ahmed iyo isbadallada guud
ahaanba ka socda dalka Itoobiya, taasoo soo kicisay xanuunka nabaro horey u jiray.
C/raxmaan Diini, Hiiraan
Online
[email protected]