Dowladda federaalka iyo maamulka gobolleedyada oo isku raacay in wada jir loola dagaalamo Al-shabaab
Jimco, November, 03, 2017 (HOL) -- Kulan looga hadlayay xaalada Amniga dalka oo
uu shir guddoominayay madaxweynaha dowladda Soomaaliya ayaa looga wada hadlay
qorshaha difaaca dalka, dagaalka ka dhanka ah Al-shabaab.
Wasiirka warfaafinta xukuumadda federaalka ah ee Soomaaliya, C/raxmaan Cumar Yariisoow oo warbaahinta la
hadlay, ayaa sheegay in shirkan uu yahay kii labaad ee golaha amaanka Qaranka
ee madaxweynaha uu shir guddoomiyo, isagoo xusay in la isku raacay
in dowladda federaalka iyo maamul goboleedyada ay si wadajir ah ula
dagaalamaan Al-shabaab.
Wasiirka, ayaa sidoo kale sheegay in shirka golaha Amniga Qaranka lagu
ansixiyey qorshaha difaaca Qaranka oo wasaaradda gaashaandhigga XFS ay soo
diyaarisay, sidoo kale wasiirka ayaa sheegay in lagu ansixiyey shirkaasi guddiga
isku dhafka ciidamada qalabka sida ee Soomaaliyeed oo ka kooban xubo ka kala
yimid dowladda Federaalka ah iyo dowlad goboleedyada Soomaaliya.
Dhinaca kale waxaa wali ka soconaya magaalada Muqdisho shirka u dhaxeeya
dowladda federaaalka iyo madaxda dowlad gobolleedyada oo ilaa iyo hadda aan
laga soo saarin War-murtiyeed leysku raacsan yahay.
C/raxmaan Diini, Hiiraan Online
[email protected]