MADAXWEYNAHA SOOMALIA: “Waxaan Rabnaa Nabad iyo Maamul Wanaag ka hirgala Dhammaan Gobollada Somalia”
Arbaco, November 06, 2013 (HOL) — Madaxweynaha Soomaaliya, Xasan Sh. Maxamuud oo xalay casho sharaf ugu sameeyay xarunta madaxtooyada ergada ka qaybgalaysa shirka dib u heshiisiinta Jubbooyinka ayaa sheegay in hadafkooda uu yahay inay nabad iyo maamul wanaag ka hirgasho dhammaan gobollada Soomaaliya.
Xafladda casho-sharafta ah waxaa ka qaybgalay wasiirka arrimaha dibadda dalka Itoobiya, Teodrus Adhonom, ra’iisul wasaaraha Soomaaliya, Cabdi Faarax, xubnaha labada gole ee dowladda iyo weliba hogaamiyaha maamulka KMG ee Jubba, Sheekh Axmed Madoobe.
“Shalay ninkii ku mashquula berri ayaa dhaafto, sidaas daraadeed waxaan kula dar-darmay ergada Jubbooyinka iyo madaxdooduba inay gacmaha is-qabsadaan kana shaqeeyaan midnimadda iyo horumarka ummadda ku nool gobollada Jubbooyinka,” ayuu yiri madaxweyne Xasan Sheekh.
Madaxweynaha oo sii hadlay ayaa yiri: “Waxaan u rabnaa nabad iyo maamul wanaag ka hirgasha dhammaan gobollada Soomaaliya. Muhiimaddana waxa weeye Soomaaliya oo mid ah oo haddana nabad ah.”
Sidoo kale, madaxweynaha ayaa soo hadal qaaday xiriirka u dhexeeya dalalka Soomaaliya iyo Itoobiya, isagoo sheegay inuu marayo maanta muddo 70-sano ka badan halkii ugu wanaagsanayd, inkastoo ay jiraan buu yiri waxyaabo badan oo u baahan in laga wada hadlo.
“Xiriirka Soomaaliya iyo Itoobiya caawa wuxuu marayaa meeshii ugu wanaagsanayd. Baal cusub ayaa noo bilawday, waxaana u mahad-celinayaa dowladda Itoobiya dadaalka ay ku bixinayso inay Soomaaliya nabad waata ka dhalato,” ayuu mar kale yiri madaxweynaha.
Dhanka kale, madaxweynuhu wuxuu sheegay in kuwa dhahaya Muqdisho ma ahan nabad uu warkoodu yahay mid aanay waxba ka jirin, isagoo tusaale u soo qaatay in wsiirka arrimaha dibadda dalka Itoobiya uu xalya ku hoyday Muqdisho.
“Waxaa la yaab ah in wasiirka arrimaha dibadda dalka Itoobiya uu caawa si nabad ah ku seexanayo Muqdisho, isagoo gaari caadi ah kusoo maray qaybo badan oo caasimadda ka tirsan. Dad aan wasiir iyo wax u dhow aheyna ay dhahaan Muqdisho ama Soomaaliya waa khatar oo lama tegi karo, taasina waa mid aan la yaabnay,” ayuu madaxweynuhu yiri.
Ugu danbeyn, madaxweynaha Soomaaliya ayaa bogaadin iyo hambalyo u soo jeediyay maamulka KMG ah ee Jubbooyinka iyo ergooyinka Jubbooyinka ee shirka ka qaybgalaya, isagoo sheegay inay ku laaban doonaan halkii ay ka yimaadeen iyagoo gacmaha is-haysta.
Maxamed Xaaji Xuseen, Hiiraan Online
[email protected]
Muqdisho, Soomaaliya
