11/13/2019
Today from Hiiraan Online:  _
Wararka Maanta- Arbaco, Jun 26, 2013
Sheekh Xasan Daahir Aweys oo Degmada Cadaado kulan Albaabadu u xiran yihiin kula Mas'uuliyiinta Maamulka Ximan iyo Xeeb


Arbaco, Juun 26, 2013 (HOL) — Sheekh Xasan Daahir Aweys oo maalmo ka hor ka goostay Al-shabaab ayaa kulammo kula leh degmada Cadaado ee gobolka Galguduud mas’uuliyiin ka tirsan maamulka Ximan iyo Xeeb oo ay degmadaas xarun u tahay.

Kulankan ayaa la sheegay inay ka qaybgalayaan madaxweynaha cusub ee maamulka Ximan iyo Xeeb iyo mas’uuliyiin kale oo maamulkaas ka tirsan iyo xubno la socda Sheekh Xasan Daahir Aweys.

Saxaafadda ayaa loo diiday in kulankaas ay ka qaybgasho, si dhab ahna looma oga waxyaabaha ay kawada hadlayaan, waxaana kulankan uu kusoo beegmayaa iyadoo saakay ay degmadaas tageen Sheekh Xasan Daahir iyo xubno Al-shabaab ka tirsanaa oo la socda.

Mas’uuliyiinta maamulka Ximan iyo Xeeb ayaa warfidiyeenka u sheegay inay shir jaraa’id wada qaban doonaan kulanka kaddib madaxweynaha maamulka Ximan iyo Xeeb iyo Sheekh Xasan Daahir Aweys, kaasoo ay ku faahfaahin doonaan waxyaabihii ay kulankooda uga hadleen.

Afhayeenka maamulka Ximan iyo Xeeb ayaa saakay VOA-da u sheegay inay gacanta ku dhigeen Sheekh Xasan Daahir Aweys iyo xubno la socday oo ka soo goostay dhawaan degmada Baraawe oo ka tirsan gobolka Shabeellada Hoose.

Lama oga mowqifka dhabka ah ee Sheekh Xasan Daahir Aweys uu kaga soo goostay Al-shabaab iyo waxyaabaha uu damacsan yahay, waxaase tegistiisa degmada Cadaado ka hadlay maamullada Ahlusunna iyo Galmudug oo ka taliya qaybo ka tirsan gobollada dhexe ee Soomaaliya.

Madaxweynaha Galmudug, Jen. Cabdi Xasan Cawaale Qaybdiid ayaa arrintan ku tilmaamay mid lala yaabo, isagoo xusay inay arki doonaan waxyabaaha uu la yimaado Sheekh Xasan Daahir.

Dhanka kale, mas’uul u hadlay maamulka Ahlusunna ayaa sheegay inay aad uga xun yihiin Sheekh Xasan Daahir lagu soo dhaweeyo deegaanno ka tisran gobollada dhexe, iyagoo sheegay inuu weli ka tirsan yahay Al-shabaab oo uu doonayo inuu fidno ka abuuro gobollada dhexe ee Soomaaliya, isagoo Ximan iyo Xeeb ku eedeeyay inay gabbaad siinayaan hoggaamiye kooxeed doonaya dhibaato ku haya ummadda Soomaaliyeed.

Sheekh Xasan Daahir Aweys ayaan saxaafadda la hadlin tan iyo markii uu ka soo goostay degmada Baraawe oo ay ka taliso Al-shabaab, iyadoo sidoo kale Al-shabaab ay sheegeen inuu ka goostay Sheekhaas oo ka tirsanaa madaxda ururkaas iyo xubno taageerayaashiisa ah.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/26/2013 3:46 PM EST
Arbaco, Juun 26, 2013 (HOL) — Madaxweynaha Somaliland, Axmed Max'ed Maxamuud (Siilaanyo) oo ka hadlayay caawa xaflad lagu xusayo 53-sano guuradii kasoo wareegtay markii gobollada waqooyiga ee Soomaaliya ay ka xoroobeen gumeysigii Ingiriiska oo ka dhacaysa madxtooyada Somaliland ayaa sheegay in gooni-isku-taagga Somaliland uu ku yimid rabitaanka shacabka oo aan laga laaban karin.

6/26/2013 1:55 PM EST
Arbaco, June 26, 2013(HOL)— Xoghayaha guud ee Guddiga Olombikada Soomaaliyeed Duran Ahmed Faarax ayaa maanta magaalada Muqdisho kula kulmay ku xigeenka Xoghayaha guud ee Qarammada Midoobay ee arrimaha Soomaaliya Nicholas Kay waxaana ay ka wada hadleen arrimo dhowr ah oo ay ka mid tahay in ciidamada laga saaro Tuulada Isboortiga ee Muqdisho iyo in Qaramada Midoobay Isbortiga u adeegsado qeyb ka mida nabadeynta Soomaaliya.

6/26/2013 12:36 PM EST
Arbaco, Juun 26, 2013 (HOL) — Dagaalkii maanta ka qarxay Kismaayo ayaa si iskiis ah u joogsaday marqibnimadii caawa iyadoo weli magaalada ay ka jiraan xiisado colaadeed oo u dhexeeyay dhinacyadii dagaalamay.

6/26/2013 12:09 PM EST
Arbaco, Juun 26, 2013 (HOL) — Soomaaliya ayaa lagu wadaa inay yeelato lacag ka duwan midda hadda la isticmaalo si ay uga baxdo ciriiriga dhaqaale haysta, sida uu sheegay sarkaal ka tirsan ha’yadda lacagta adduunka ee IMF oo ka mid ahaa saraakiil Nairobi kula kulmay mas’uuliyiin Soomaali ah.

6/26/2013 11:33 AM EST
Soomaalida ku nool dalka Kenya oo markii hore ganacsiyadoodu u badnaayeen magaalada Nairobi, gaar ahaanna xaafada Islii ayaa haatan aad moodaa inay aad u maalgashayaan magaalada Mombasa ee gobolka xeebta ah ee Kenya.

6/26/2013 11:19 AM EST
Arbaco, Juun 26, 2013 (HOL) — Madaxweynaha Soomaaliya, Xasan Sheekh Maxamud oo maanta xarunta madaxtooyada Soomaaliya kula kulmay wafdi ka socday Midowga Yurub ayaa sheegay in shirka Brussels lagu qaban doono 16-ka bisha September ee sannadkan 2013 uu muhiimad weyn u leeyahay Soomaaliya.

6/26/2013 11:19 AM EST
Arbaco, Juun 26, 2013 (HOL) — Ra'iisal wasaaraha Somalia, Cabdi Faarax Shirdoon (Saacid) oo maanta si rasmi ah u furay kulankii guddi hoosaadka heshiiska caalamka ee loo yaqaano New Deal ayaa muujiyay sida weyn ee loogu han-weyn yahay shirka Brussels ee qorshahan lagu fariisin doono.

6/26/2013 9:37 AM EST
Arbaco, Juun 26, 2013 (HOL) — Dood-cilmiyeed uu cinwaankiisu ahaa “Fluid movement across capillary membrane from bench side to bedside” oo lagu sharxay sida ay dareerayaashu ugu dhaqaaqaan gudaha jirka aadanaha iyo saamaynta ay ku leeyihiin caafimaadka ayaa maanta lugu qabtay hoolka siminaarrada ee Jaamacadda Jamhuriya of science and technology (JUST) ee magaalada Muqdisho.

6/26/2013 8:49 AM EST
Arbaco, Juun 26, 2013 (HOL) — Guddoomiyaha maamulka gobolka Hiiraan Cabdi Faarax Laqanyo ayaa u dirray shacabka Soomaaliyeed hambalyo ku aadan 53 sano guuradii ka soo wareegtay markii ay gobollada W/qooyi ee Soomaaliya ka xorroobeen gumeystihii Ingariiska, islamarkaana la taagay ama la surray calanka Jamhuuriyada Soomaaliya.

6/26/2013 8:41 AM EST
Dalka Kenya oo ay ku noolyihiin boqollaal kun oo Soomaali ah ayaa laga dareemayaa diyaar garow loogu jiro xuska maalinta 1-da Luuliyo oo ah markii ay gobollada koonfureed ee Soomaaliya ay xoreebeen isla markaana ay isku biireen waqooyiga iyo koonfurta.

6/26/2013 8:33 AM EST
Arbaco, Juun 26, 2013 (HOL) — Dagaal culus ayaa goor-dhow ka qarxay gudaha magaalada Kismaayo ee xarunta gobolka Jubbada Hoose, kaasoo u dhexeeya maleeshiyooyin magaalada kuwada sugan, iyadoo ay xirmeen guud ahaan isku socodkii magaalada iyo ganacsigii.

6/26/2013 8:22 AM EST
Arbaco, Juun 26, 2013 (HOL) — Madaxweynaha Soomaaliya, Xasan Sheekh Maxamuud ayaa sheegay inay Somaliland u sameynayaan wax walba oo la awoodi karo oo tanaasul ah si loo helo Soomaaliya oo mid ah, kaddib hadal uu ka jeediyay munaasabad lagu maamuusayay 26-ka Juun oo xalay lagu qabtay xarunta madaxtooyada Soomaaliya.

6/26/2013 8:02 AM EST
Arbaco, Juun 26, 2013 (HOL) — Wafdiga uu horkacayo wasiirrka difaaca xukuumada Soomaaliya C/xakiin Xaaji Max'uud Fiqi, safiirka dowladda Jabuuti, mas'uuliyiinta maamulka gobolka Hiiraan, saraakiisha ciidamada Jabuuti iyo dadweyne isaga kala yimid xaafadaha magaalada Baladweyne ayaa galinkii danbe ee maalintii shalay ka wada qeyb-gallay daawashada gabadbada tartanka kubada cagta oo maalmihii ugu danbeeyay ka soconayay magaalada Baladweyne.

6/26/2013 3:54 AM EST
Talaado, Juun 26, 2013 (HOL) — Marka la gaaro dabayaaqada bisha Juun ee sanad walba waxaa lagu qabtaa Gobolka Minnesota ee dalka Mareykanka oo ay Soomaali fara badan deggen yihiin tartammo isboorti oo lagu xusayo maalmaha xoriyada Soomaaliyeed.

6/26/2013 2:33 AM EST
Arbaco, Juun 26, 2013 (HOL) — Mudanaasabad lagu xusayay maalintii xorriyadda gobollada waqooyi ee Soomaaliya oo ku beegnayd 26-ka Juun, 1960-kii ayaa xalay lagu qabtay madaxtooyada Soomaaliya, taas oo ay kasoo qaybgaleen mas'uuliyiinta dowladda iyo dadweyne kale oo fara badan.

6/26/2013 12:49 AM EST
Arbaco, June 26, 2013(HOL) :- Maamulka Ximin iyo Xeeb ayaa shaaciyay in xalay saqdii dhexe uu isu soo dhiibay Sheekh Xasan Daahir Aweys oo xubin ka ahaa ururka Al-shabaab islamarkaana hore u hogaamin jiray ururkii burburay ee la magac baxay Xizbul Islaam.