11/22/2019
Today from Hiiraan Online:  _
Wararka Maanta- Arbaco, Jun 26, 2013
Magaalada Muqdisho oo lagu Qabtay Xaflad lagu Maamuusayay 53-guuradii kasoo Wareegtay Xorriyadii Gobollada Waqooyi (SAWIRRO)



Arbaco, Juun 26, 2013 (HOL) — Mudanaasabad lagu xusayay maalintii xorriyadda gobollada waqooyi ee Soomaaliya oo ku beegnayd 26-ka Juun, 1960-kii ayaa xalay lagu qabtay madaxtooyada Soomaaliya, taas oo ay kasoo qaybgaleen mas'uuliyiinta dowladda iyo dadweyne kale oo fara badan.

Xuskan oo ah kii 53-aad ayaa waxaa hadallo kala duwan ka jeediyay madaxda dowladda Soomaaliya, kuwaasoo sheegay in midnimada dalka Soomaaliya ay tahay mid lama taabtaan ah, iyagoo xusay inay sii socon doonaan wadahadallada ay kula jiraan Somaliland.

"Xukuumaddu waxay si adag ugu dhawaaqeeysaa inay ka go’an tahay midnimada ummadda Soomaaliyeed, waxaana caddeynaynaa inaan sii wadi doonno wadahadalka aan kula jirno Somaliland," ayuu ra'iisul wasaaraha Soomaaliya, Cabdi Faarax Shirdoon (Saacid) ku yiri khudbad uu ka jeediyay munaasabadda.

Guddoomiyaha maxkamadda sare ee dalka, Avv. Caydiid C/llaahi Ilko-xanaf oo isaguna hadal ka jeediyay munaasabadda ayaa sheegay in midnimada Soomaaliya ay tahay muqaddsan, wuxuuna Somaliland ugu baaqay in dhibaatadii dalka ka dhacday ay taabatay Soomaali oo dhan oo aan loo baahnayn inay marmarsiiyo ka dhigtaan waxaas ayaa nala yeelay, balse looga baahan yahay ogolaadaan inay Soomaaliya ka mid yihiin.

Wasiirradda arrimaha dibadda ahna ku xigeenka ra'iisul wasaaraha, Fowsiyo Yuusuf Xaaji Aadan oo iyaduna goobta ka hadashay ayaa sheegtay inay aad ugu faraxsan tahay in munaasabadda 26-ka Juun ay markii ugu horreysay kaga qaybgasho Muqdisho tan iyo markii ay bur-burtay dowladdii dhexe ee Soomaaliya.

"Anigoo yar ayaa abbahay na keenay calan-saarkii, waxay ahayd habeen qiimo gaar ah ii leh, waxaana ku faraxsanahay in xuskaas uu sii socdo," ayay tiri wasiiradda oo intaas ku dartay inay Soomaali weyn oo dhan ugu baaqayso inay xusaan maalmaha xorriyadda.

Guddoomiyaha baarlamaanka Soomaaliya, Maxamed Sheekh Cismaan (Jawaari) oo isaguna xafladda ka hadlay ayaa sheegay in lasii wado wadahadallada u dhexeeya Soomaaliya iyo Somaliland, isagoo sheegay inuu rajeynayo in wadahadalladaas ay noqdaan kuwo miro-dhal ah.

"Runtii anigoo ku hadlaya magacayga, kan guddoonka baarlamaanka iyo magaca xildhibaannada waxaan dhiirigelinayaa wadahadallada u dhexeeya dowladda Soomaaliya iyo Somaliland, waxaan shacab iyo xukuumadba ka codsanayaa in laga fogaado wax walba oo dhibaato ku keeni kara wadahadalladaas, shacabkana waxaan ku boorinayaa inay ka qaybqaataan sidii wadahadalladaas ay miro-dhal u noqon lahaayeen," ayuu yiri Jawaari.

Madaxweynaha Soomaaliya, Xasan Sheekh Maxamuud oo xafladda ka hadlay ayaa sheegay in Soomaaliya ay hadda gashay marxalad cusub oo ka duwan tii hore, isagoo u duceeyay aabbayaashii xorriyadda dalka u soo halgamay.

"Dadkii hore tiro ahaan way naga yaraayeen, aqoon ahaan way naga hooseeyeen, dhaqaale ahaan way naga hooseeyeen dhaqaalle ahaanna wey naga hooseeyeen, sidaas oo tahayba waxay dalka ka xoreeyeen gurmeystihii haystay. Guddoomiyaha maxkamadda sare waxaan ku raacsanahay inaan qirano dhibaatadii dalka ka dhacday inaan annaga mas'uuliyaddeeda leennahay, waa inaan marnaa jidkii ay aabayaasheen noo faleen oo ah Soomaali oo mid ah, Qarannimadeediina difaacanaysa," ayuu madaxweynuhu ku yiri hadalkii uu ka jeediyay munaasabadda.

Ugu dambeyn, waxaa 12:00 habeenimo ee saqdii dhexe ee xalay la saaray calanka buluugga ah ee dhexda xidigta ku leh ee ay Soomaaliya caanka ku tahay, iyadoo madaxda dowladdu ay salaan-sharaf ka qaateen cutubyo ka tirsan ciidamada xoogga dalka.

Sidoo kale, intii ay xafladdu socotay waxaa heeso guubaabo iyo madadaalo ah kasoo jeedinayay fannaaniin Soomaaliyeed, iyadoo heesihii ay qaadayeen ku cabirayay xaaladda dalk uu marayo iyo waayihii uu soo maray.









Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/26/2013 3:46 PM EST
Arbaco, Juun 26, 2013 (HOL) — Madaxweynaha Somaliland, Axmed Max'ed Maxamuud (Siilaanyo) oo ka hadlayay caawa xaflad lagu xusayo 53-sano guuradii kasoo wareegtay markii gobollada waqooyiga ee Soomaaliya ay ka xoroobeen gumeysigii Ingiriiska oo ka dhacaysa madxtooyada Somaliland ayaa sheegay in gooni-isku-taagga Somaliland uu ku yimid rabitaanka shacabka oo aan laga laaban karin.

6/26/2013 1:55 PM EST
Arbaco, June 26, 2013(HOL)— Xoghayaha guud ee Guddiga Olombikada Soomaaliyeed Duran Ahmed Faarax ayaa maanta magaalada Muqdisho kula kulmay ku xigeenka Xoghayaha guud ee Qarammada Midoobay ee arrimaha Soomaaliya Nicholas Kay waxaana ay ka wada hadleen arrimo dhowr ah oo ay ka mid tahay in ciidamada laga saaro Tuulada Isboortiga ee Muqdisho iyo in Qaramada Midoobay Isbortiga u adeegsado qeyb ka mida nabadeynta Soomaaliya.

6/26/2013 12:36 PM EST
Arbaco, Juun 26, 2013 (HOL) — Dagaalkii maanta ka qarxay Kismaayo ayaa si iskiis ah u joogsaday marqibnimadii caawa iyadoo weli magaalada ay ka jiraan xiisado colaadeed oo u dhexeeyay dhinacyadii dagaalamay.

6/26/2013 12:09 PM EST
Arbaco, Juun 26, 2013 (HOL) — Soomaaliya ayaa lagu wadaa inay yeelato lacag ka duwan midda hadda la isticmaalo si ay uga baxdo ciriiriga dhaqaale haysta, sida uu sheegay sarkaal ka tirsan ha’yadda lacagta adduunka ee IMF oo ka mid ahaa saraakiil Nairobi kula kulmay mas’uuliyiin Soomaali ah.

6/26/2013 11:33 AM EST
Soomaalida ku nool dalka Kenya oo markii hore ganacsiyadoodu u badnaayeen magaalada Nairobi, gaar ahaanna xaafada Islii ayaa haatan aad moodaa inay aad u maalgashayaan magaalada Mombasa ee gobolka xeebta ah ee Kenya.

6/26/2013 11:19 AM EST
Arbaco, Juun 26, 2013 (HOL) — Madaxweynaha Soomaaliya, Xasan Sheekh Maxamud oo maanta xarunta madaxtooyada Soomaaliya kula kulmay wafdi ka socday Midowga Yurub ayaa sheegay in shirka Brussels lagu qaban doono 16-ka bisha September ee sannadkan 2013 uu muhiimad weyn u leeyahay Soomaaliya.

6/26/2013 11:19 AM EST
Arbaco, Juun 26, 2013 (HOL) — Ra'iisal wasaaraha Somalia, Cabdi Faarax Shirdoon (Saacid) oo maanta si rasmi ah u furay kulankii guddi hoosaadka heshiiska caalamka ee loo yaqaano New Deal ayaa muujiyay sida weyn ee loogu han-weyn yahay shirka Brussels ee qorshahan lagu fariisin doono.

6/26/2013 9:37 AM EST
Arbaco, Juun 26, 2013 (HOL) — Dood-cilmiyeed uu cinwaankiisu ahaa “Fluid movement across capillary membrane from bench side to bedside” oo lagu sharxay sida ay dareerayaashu ugu dhaqaaqaan gudaha jirka aadanaha iyo saamaynta ay ku leeyihiin caafimaadka ayaa maanta lugu qabtay hoolka siminaarrada ee Jaamacadda Jamhuriya of science and technology (JUST) ee magaalada Muqdisho.

6/26/2013 8:49 AM EST
Arbaco, Juun 26, 2013 (HOL) — Guddoomiyaha maamulka gobolka Hiiraan Cabdi Faarax Laqanyo ayaa u dirray shacabka Soomaaliyeed hambalyo ku aadan 53 sano guuradii ka soo wareegtay markii ay gobollada W/qooyi ee Soomaaliya ka xorroobeen gumeystihii Ingariiska, islamarkaana la taagay ama la surray calanka Jamhuuriyada Soomaaliya.

6/26/2013 8:41 AM EST
Dalka Kenya oo ay ku noolyihiin boqollaal kun oo Soomaali ah ayaa laga dareemayaa diyaar garow loogu jiro xuska maalinta 1-da Luuliyo oo ah markii ay gobollada koonfureed ee Soomaaliya ay xoreebeen isla markaana ay isku biireen waqooyiga iyo koonfurta.

6/26/2013 8:33 AM EST
Arbaco, Juun 26, 2013 (HOL) — Dagaal culus ayaa goor-dhow ka qarxay gudaha magaalada Kismaayo ee xarunta gobolka Jubbada Hoose, kaasoo u dhexeeya maleeshiyooyin magaalada kuwada sugan, iyadoo ay xirmeen guud ahaan isku socodkii magaalada iyo ganacsigii.

6/26/2013 8:22 AM EST
Arbaco, Juun 26, 2013 (HOL) — Madaxweynaha Soomaaliya, Xasan Sheekh Maxamuud ayaa sheegay inay Somaliland u sameynayaan wax walba oo la awoodi karo oo tanaasul ah si loo helo Soomaaliya oo mid ah, kaddib hadal uu ka jeediyay munaasabad lagu maamuusayay 26-ka Juun oo xalay lagu qabtay xarunta madaxtooyada Soomaaliya.

6/26/2013 8:02 AM EST
Arbaco, Juun 26, 2013 (HOL) — Wafdiga uu horkacayo wasiirrka difaaca xukuumada Soomaaliya C/xakiin Xaaji Max'uud Fiqi, safiirka dowladda Jabuuti, mas'uuliyiinta maamulka gobolka Hiiraan, saraakiisha ciidamada Jabuuti iyo dadweyne isaga kala yimid xaafadaha magaalada Baladweyne ayaa galinkii danbe ee maalintii shalay ka wada qeyb-gallay daawashada gabadbada tartanka kubada cagta oo maalmihii ugu danbeeyay ka soconayay magaalada Baladweyne.

6/26/2013 7:00 AM EST
Arbaco, Juun 26, 2013 (HOL) — Sheekh Xasan Daahir Aweys oo maalmo ka hor ka goostay Al-shabaab ayaa kulammo kula leh degmada Cadaado ee gobolka Galguduud mas’uuliyiin ka tirsan maamulka Ximan iyo Xeeb oo ay degmadaas xarun u tahay.

6/26/2013 3:54 AM EST
Talaado, Juun 26, 2013 (HOL) — Marka la gaaro dabayaaqada bisha Juun ee sanad walba waxaa lagu qabtaa Gobolka Minnesota ee dalka Mareykanka oo ay Soomaali fara badan deggen yihiin tartammo isboorti oo lagu xusayo maalmaha xoriyada Soomaaliyeed.

6/26/2013 12:49 AM EST
Arbaco, June 26, 2013(HOL) :- Maamulka Ximin iyo Xeeb ayaa shaaciyay in xalay saqdii dhexe uu isu soo dhiibay Sheekh Xasan Daahir Aweys oo xubin ka ahaa ururka Al-shabaab islamarkaana hore u hogaamin jiray ururkii burburay ee la magac baxay Xizbul Islaam.