3/28/2024
Today from Hiiraan Online:  _
Wararka Maanta- Arbaco, Aug 28, 2013
Shirkii Dowladda Somalia iyo Jubbaland uga socday Magaalada Addis Ababa ee dalka Itoobiya oo heshiis buuxa lagu gaaray

Arbaco, August 28, 2013 (HOL) — Shirkii toddobaadyadan uga socday magaalada Addis Ababa ee dalka Itoobiya ergooyin ka kala socday dowladda Somalia iyo maamulka Jubbaland ayaa lagu gaaray heshiis buuxa, iyadoo lagu wado in ergooyinka ay si rasmi ah u saxiixaan heshiiskan gellinka dambe ee maanta oo Arbaco ah.

Ilo wareedyo ay la xiirtay HOL ayaa xaqiijiyay in qodobki maalmihii ugu dambeeyay la isku haya heshiis laga gaaray, kuwaasoo ahaa cidda maamulaysa garoonka diyaaradaha iyo dekedda magaalada Kismaayo.

Maamulka ilaha dhaqaalaha Kismaayo ayaa waxaa lagu heshiiyay inay lix bilood uu maamulo maamulka la sameynayo ee Jubba, kaasoo uu madax u yahay, Sheekh Axmed Maxamed Islaam (Sheekh Axmed Madoobe) markaas kaddibna loo sameeyo guddi wadajir ah oo maamula.

Qodobbada kale ee lagu heshiiyay ayaa waxaa ka mid ah ciidanka maamulkii hore ee Jubbaland la qarameeyo iyo in shir dib u heshiisiin ah lagu qabto magaalada Muqdisho ee xarunta Soomaaliya.

Heshiiskan ayaa wuxuu meesha ka saarayaa khilaafkii siyaasadeed salka ku haya jiritaanka maamulka Jubbaland oo u dhexeeya dowladda Soomaaliya iyo xubnaha maamulkaas hoggaaminayay.

Ergooyinka labada dhinac ayaa waxay heshiiskan si rasmi ah u saxiixayaan inta u dhexeysa 2:00 illaa 3:00 galabnimo ee maanta, waxaana ku bixisay dadaal fara badan in labada dhinac ay heshiiskan gaaraan dowladda Itoobiya, iyadoo dhowr jeer uu shirku ku sigtay in lagu kala kaco.

Xubnaha shirkan sida weyn uga dhex muuqday ayaa waxaa ka mid ah, Sh. Axmed Madoobe, Prof. Maxamed Cabdi Gaani iyo ra’iisul wasaarihii hore ee Soomaaliya, Cumar C/rashiid Cali Sharma’arke oo dhinaca Jubbaland ka socday.

Sidoo kale, dhinaca dowladda Soomaaliya waxaa shirkaas si weyn ug dhex-muuqday dajiraha Soomaaliya u fadhiya dalka Britain, Sanbololshe, wasiir-u-dowlaha madaxtooyada Soomaaliya, Faarax Sheekh C/qaadir iyo la taliyaha dhinaca siyaasadda ee madaxweynaha Soomaailya, C/raxmaan C/shakuur Warsame.

Tan iyo bishii May ee sannadkan markaasoo lagu dhawaaqay maamulka uu madaxda ka yahay Sheekh Axmed Madoobe, waxaa jiray muran siyaasadeed u dhexeeyay dowladda iyo mas’uuliyiinta maamulkaas, inkastoo heshiiskan uu soo af-jarayo dhammaan murankaas.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/28/2013 2:25 PM EST
Arbaco, August 28, 2013 (HOL) — Buuq looga soo horjeedo madaxweyne ku xigeenka maamulka Puntland, Jen. C/samad Cali Shire ayaa maanta ka dhacay magaalada Taleex ee gobolka Sool, xilli uu la socday madaxweyne ku xigeenka maamulka Khaatumo.

8/28/2013 1:15 PM EST
Arbaco, August 28, 2013 (HOL) — Hoggaamiyaha maamulka KMG ah ee loo sameynayo gobollada Jubbooyinka iyo Gedo, Sheekh Axmed Madoobe ayaa sheegay in hirgelidda heshiiskan uu sabab u ahaa madaxweynaha Somalia, Xasan Sheekh Maxamuud oo mar walba ku boorrinayay ergooyinka inaan la kala tegin ee heshiis laga gaaro khilaafka jira.

8/28/2013 11:24 AM EST
Arbaco, August 28, 2013 (HOL) — Madaxweynaha dowladda Soomaaliya, Xasan Sheekh Maxamuud ayaa maanta kormeeray taliska cusub ee qaybta 12-ka Abriil ee ciidanka xoogga dalka iyo taliska guud wasaaradda gaashaandhigga Soomaaliya.

8/28/2013 11:16 AM EST
Arbaco, August 28, 2013 (HOL) — Madaxwaynaha Somaliland, Axmed Maxamed Maxamuud (Siilaanyo) iyo wafdi uu hoggaaminayo ayaa si diirran loogu soo dhaweeyay magaalada Boorama ee gobolka Awdal, iyadoo sidoo kale lagu soo dhaweeyay deegaanka Dilla halkaasoo ay muddo ku nasteen hadallo soo dhaweyn ahna ay kaga dhageysteen dadka deegankaas.

8/28/2013 10:14 AM EST
Arbaco, August 28, 2013 (HOL) — Dowladda Soomaaliya iyo maamulka Jubbaland ayaa goor-dhow heshiis dhowr qodob ka kooban ku kala saxiixday magaalada Addis Ababa ee xarunta Itoobiya, halkaasoo toddobaadyadii lasoo dhaafay ay ku lahaayeen kulammo.

8/28/2013 10:11 AM EST
Arbaco, August 28, 2013 (HOL) — Kooxda kubadda Kollayga ee magaca Ciidaanka Asluubta Somaliland ku ciyaarta, ayaa shalay kaga badiyey kooxda magaca Caasimadda Jabuuti ku ciyaarta 58 dhibcood, halka kooxda Jabuutina keensatay 48 dhibcood.

8/28/2013 10:10 AM EST
Arbaco, August 28, 2013 (HOL) — Ururka Islaax ayaa guddoomiyaha shanta sano ee soo socota u doortay Dr. Cali Baashir Cumar Rooraaye oo mudadii lasoo dhaafay xilkan hayay, iyadoo Alle looga baryay inuu xilkiisan cusub u fududeeyo.

8/28/2013 9:04 AM EST
Arbaco, August 28, 2013 (HOL) — Dalka Marykanka oo dhan ayaa maanta laga xusayaa Martin Luther King oo ahaa nin madow oo jeediyay khudbad saameyn xooggan yeelatay oo uu jeediyay sannadkii 1963-kii taasoo ahayd (I have a Dream) oo macnaheedu yahay waan riyoonaayaa.

8/28/2013 8:45 AM EST
Arbaco, August 28, 2013 (HOL) — Wasiirka arrimaha dibadda ee Shiinaha, Wang Yi ayaa sheegay in dalkiisa uu xiriir dhow oo dhinaca dhaqalaaha iyo ganacsiga ah la yeelanayo Soomaaliya, isagoo xusay inay ka qaybqaadan doonaan dib u dhiska Soomaaliya.

8/28/2013 7:38 AM EST
Arbaco, August 28, 2013 (HOL) — Shir saddex maalmood socday oo looga hadlayay dib u dhiska iyo xoojinta dowladda Soomaaliya ayaa lagu soo gabagabeeyay magaalada Addis Ababa ee xarunta dalka Itoobiya, kaasoo ay ka qaybgaleen aqoonyahanno Soomaaliyeed iyo khuburro caalami ah.

8/28/2013 7:12 AM EST
Arbaco, August 28, 2013 (HOL) — Kulan looga hadlayay ammaanka Muqdisho ayaa maanta ka dhacay dugsiga tababarka booliiska Soomaaliya ee magaalada Muqdisho, kaasoo ay ka qaybgaleen mas’uuliyiin dowladda ka tirsan iyo dadweyne fara badan.

8/28/2013 7:11 AM EST
Arbaco, August 28, 2013 (HOL) — Maamulka gobolka Shabeellada Hoose ee dowladda Soomaaliya ayaa dalbaday in ciidamada milateriga laga saaro guud ahaan gobolka, lana geeyo ciidammo booliis iyo nabad ah si ay amniga u xaqiijiyaan.

8/28/2013 6:57 AM EST
Arbaco, August 28, 2013 (HOL) — Howlgallo lagu qabqabtay dad fara badan ayay maanta ciidamada dowladda Soomaaliya ka sameeyeen degmooyin ka tirsan gobolka Banaadir, iyadoo saraakiisha dowladdu ay sheegeen in howl-galladan ay yihiin kuwo looga hortagayo weerarrada argagaxiso ee kooxda Al-shabaab ay ka geysanayso Soomaaliya.

8/28/2013 2:24 AM EST
Arbaco, August 28, 2013 (HOL) — Waxaa lagu wadaa in maanta barqdii ay soo cago-dhigato garoonka diyaaradaha Muqdisho diyaarad weyn oo dalka Turkiga laga leeyahay, taasoo aan horay u imaan magaalada Muqdisho.

8/28/2013 2:23 AM EST
Arbaco, August 28, 2013 (HOL) — Qoxootiga Soomaalida ee ku jira xeryaha Dhadhaab ee Kenya ayaa toddobaadkan dooranaya hoggaamiyeyaal cusub, xilli ay dowladda Kenya qorsheynayso in qoxootiga dib loogu celiyo dalkooda Soomaaliya.

8/28/2013 1:55 AM EST
Arbaco, August 28, 2013 (HOL) — Wasiirka difaacaddda dowladda Soomaaliya, C/xakiin Maxamuud Xaaji Fiqi ayaa sheegay in wasaaraddiisu ay fulisay qorshaha mushaar kordhinta ciidamada dowladda oo dhawaan uu ansixiyay baarlamaanka Soomaaliya.