6/19/2019
Today from Hiiraan Online:  _
Wararka Maanta- Axad, Apr 7 , 2013
Baarlamaanka Puntland oo Ansixiyay Wax-ka-badal lagu Sameeyay Qodobbo ka mid ah xeerka Doorashooyinka dhacaya Bisha May


Axad, Abriil 07, 2013 (HOL) — Iyadoo ay dhowr todobaad oo qura ka harsan yihiin xilliga la shaaciyey in ay qabsoomi doonto doorashada goleyaasha deegaanka ee Puntland - oo ah tii ugu horeysey ee nooceeda ah- ayuu shalay golaha wakiillada ee Puntland cod aqlabiyad leh ku meel mariyey qodobo uu guddiga doorashooyina codsaday in wax laga bedelo.

Qodobadaas oo muran xooggan ka dhaliyey saaxada siyaasadda ee Puntland, ayaa waxaa ugu muhiimsan: diiwaan gelinta shacabka, kala xadeynta gobollada iyo weliba sameynta kaararka aqoonsiga ee dadka cod bixiyeyaasha ah.

Gudoomiyaha baarlamaanka oo shalay warbaahinta la hadlay, kaddib markii uu soo gaba gaboobey kal-fadhi aan caadi ahayn oo ay maalmihii lasoo dhaafay u fadhiyeen, kaasoo ay kaga doodayeen qodobo uu guddiga doorashooyinku codsaday in wax laga bedelo, maadaama aysan xilligan suurtagal ahayn, ayaa sharraxay go'aanka uu baarlamaanku arintaas ka qaatay.

Wuxuuna tilmaamay in doorashadani ay tahay tii ugu horeysey ee nooceeda ah ee Puntalnd ka dhacda, sidaas darteedna aysan suurtagal ahayn in la qaado tallaabooyin badan oo doorashada muhiim u ah, sida diiwaan gelinta dadka oo si kumeel gaar ah looga maarmay, maadaama - sida uu gudoomiyuhu sheegay- ay jiraan caqabado badan oo dhanka ammaanka iyo dhaqaalaha ah.

Dhinaca kale, waxaa sii xoogeystey cabashada ku aadan wax ka bedelka xeerka doorashooyinka ee kasoo yeereysa ururada siyaasadda ee iyagu doorashadaas ku tartami doona. Ururada MIDNIMO iyo UDAD oo kamid ah 6-da urur-siyaasadeed ee doorashadaas geli doona, islamarkaana bulshada dhexdeeda ku leh taageero aad u xoogan, ayaa khamiistii lasoo dhaafay si cad u sheegay in ay gebi ahaanba qaadaceen doorashada loo dareerayo bisha May ee soo socota.

Go'aankaas isaga ah ayey sabab uga dhigeen in uu yimid kaddib markii ay u muuqatay in doorashadaasi aysan noqon karin mid xalaal ah; maadaama meesha laga saaray xeerar muhiim ah oo la'aantood aysan doorashadu qabsoomi karin. Afarta urur ee kale ee uu ku jira ururka HORSEED ee uu gudoomiyaha ka yahay madaxweyne Faroole ayaa soo dhoweeyey go'aanka uu baarlaaanku wax kaga bedeley xeerka doorashooyinka.

Maamulka Puntland oo la dhisay sanadkii 1998, ayaa mudadii uu jiray ahaa mid ku taagan nidaamka maamul ee wax ku qaybsiga hab beeleedka, waxaana in muddo ah soo socdey dadaal ku aadan sidii maamulka looga dhigi lahaa mid ku yimaada doorashooyin xor ah iyo tartanka axsaabta badan.

Maxamed Salaad Xaaji Dirir, Hiiraan Online
[email protected]
Puntland, Soomaaliya










Click here
4/7/2013 1:35 PM EST
Axad, Abriil 07, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) iyo wafdi uu hoggaaminayo oo ku sugan dalka Norway ayaa waxay kulammo isugu jira wadatashi iyo kuwo howleed la qaateen hay’adda NDI oo taageerta baarlamaanka Soomaaliyad.

4/7/2013 12:11 PM EST
Axad, April 07, 2013(HOL): Waxaa shalay lagu qabtay magaalada Stockholm ee dalka Sweden shir sanadeedkii Ururka Isbaheysiga Umadda Soomaaliyeed, kaasi oo ay ka qeybgaleen wakiillada xisbiga ee dalka Sweden.

4/7/2013 9:10 AM EST
Axad, Abriil 07, 2013 (HOL) — Wakiilka Midowga Afirka ee Soomaaliya, danjire Maxmaed Saalax Anaadiif oo ay wehliayaan taliyaha guud ee ciidamada AMISOM, Jen. Andrew Gutti, madaxa xafiiska Qaramada Midoobay ee taageera AMISOM (UNSOA), Amadou Carama iyo taliyaha ciidamada Kenya ee qaybta ka ah AMISOM, Maj-Gen. Francis K. Nthenge ayaa booqasho ku tagay magaalada Kismaayo ee gobolka Jubbada Hoose.

4/7/2013 9:02 AM EST
Axad, Abriil 07, 2013 (HOL) — Madaxweynaha Somaliland Axmed Maxamed Maxamuud Siillaanyo, ayaa maanta soo saaray amar wax lagaga qabanayo ciddii ka hor timaadda shirkadda Shiidaalka ka baadhaysa deegaano ka mid ah Bariga Somaliland.

4/7/2013 8:35 AM EST
Axad, Abriil 07, 2013 (HOL) — Gudoomiyihii golaha deegaanka Hargeysa, isla markaana ahaa Maayarkii Hargeysa Eng:Yusuf Warsame Siciid ayaa saaka ku geeriyooday wadanka imaaraadka Carabta oo uu muddo ku xanuunsanayay.

4/7/2013 8:22 AM EST
Axad, Abriil 07, 2013 (HOL) — Wafdi ka socda dowladda federaalka oo ka kooban wasiirro, xildhibanno iyo mas’uuliyiinta maamulka gobollka Hiiraan ayaa maanta gaaray magaalada Baladweyne.

4/7/2013 8:18 AM EST
Axad, Abriil 07, 2013 (HOL) — Magaalada Baydhabo ayaa waxaa lagu aasay marxuum Xasan Maxamed Nuur (Shaati-guduud) oo horraantii bishan ku geeriyooday isbitaal ku yaalla dalka Jarmalka, waxaana aaskiisa ka qayb-galay xubno ka tirsan dowladda Soomaaliya.

4/7/2013 8:09 AM EST
Axad, Abriil 07, 2013 (HOL) — Sannad ka hor ayey ahayd markii bangiyada dalka Mareykanku ay ku dhawaaqeen in aysan la shaqeynaynin xawaaladaha Soomaalida, islamarkaasna ay xireen guud ahaan xisaabaadkii iyo koontooyinkii ay ku lahaayeen, iyagoo xiligaasi ku andaacoonayey cabsi ay ka qabaan in lacagta fara badan ee xawaaladuhu u diraan gudaha Soomaaliya ay ku dhacdo gacan qaldan ama tan kooxda Al-shabab oo ay dowladda Mareykanku u aqoonsan tahay argagixiso.

4/7/2013 7:48 AM EST
Axad, Abriil 07, 2013 (HOL) — Wefdi ballaaran oo ka socda dalka koonfur Afrika oo gelinkii danbe ee shalay soo gaarey magaalada Garoowe ee xarunta maamulka Puntland, ayaa kulamo la qaatay madaxweynaha Puntland Cabdiraxmaan Maxamed (Faroole) iyo xubno ka tirsan golaha wasiirrada.

4/7/2013 2:29 AM EST
Axad, Abriil 07, 2013 (HOL) — Koox fanaaniin ah oo doonayey inay bandhig faneed ku qabtaan magaaladda Burco ayaa dhibaato ka soo gaadhay ka dib markii hoolkii ay ku qabanayeen la isku qabsaday.

4/7/2013 1:35 AM EST
Axad, Abriil 07, 2013 (HOL) — Dowladda Soomaaliya oo ka jawaabaysay digniin ay dowladda Ingiriisku ku sheegtay in Muqdisho ay ka dhici karaan falal argagaxiso ayay dowladda Soomaaliya sheegtay inaysan jirin hadda khatar muuqata oo ka jirta Muqdisho.

4/7/2013 1:34 AM EST
Axad, Abriil 07, 2013 (HOL) — Maydkii Xasan Maxamed Nuur (Shaati-guduud) oo toddobaadkii hore ku dhintay dalka Jamalka ayaa saakay laga soo dajiyay garoonka diyaaradaha caalamiga ah ee Muqdisho, halkaasoo lagula tunayo salaadda janaasada, kaddibna waxaa loo duulinayaa degmada Baydhabo ee gobolka Bay si halkaas loogu aaso.