3/28/2024
Today from Hiiraan Online:  _
Wararka Maanta- Axad, Apr 7 , 2013
Koox Fannaaniin ah oo lagu weerarya Magaalada Burco ee Gobolka Togdheer; iyadoo laga joojiyay Bandhig ay Qaban Lahaayeen

Axad, Abriil 07, 2013 (HOL) — Koox fanaaniin ah oo doonayey inay bandhig faneed ku qabtaan magaaladda Burco ayaa dhibaato ka soo gaadhay ka dib markii hoolkii ay ku qabanayeen la isku qabsaday.

Fanaaniintan oo ah koox cusub oo dhallinyaro ah oo la baxay fanaaniinta geeska, ayaa bandhigoodii aanu u qabsoomin ka dib markii dad cadhaysani weerar la beegsadeen kooxdaasi, kuwaas oo khasaare fudud ka soo gaadhsiiyey hoteelkii lagu qabanayey, gaadiidkii iyo fanaaniinta qaarkood.

Fanaaniintan ayaa waxa ka hor yimid culimadda gaar ahaan guddida wanaag farista iyo xumaan reebista, kuwaas oo bandhigaasi ku tilmaamay mid aanay diintu ogolayn, taasina waxay sababtay in maalintii balantu ahayd dib uga dhacdo, haseyeeshee waxay mar labaad isku dayeen inay bandhigooddu u qabsoonto, waxaanay dadkii rabay inay ka qaybgalaan munaasibadaasi ay kaadhadhkii lagu galayey oo toban dollar ahayd maalinimadii sii goosteen si aan looga bixin, nasiib darase wakhtigii ay fanaaniintu hoolka soo galeen ayaa weerarkan lagu beegsanayey ay dhacday.

Dad ku sugan magaaladda Burco oo aanu la xidhiidhnay ayaa sheegay in fanaaniintu dib uga dhaceen wakhtigii ay bilaabmi lahayd bandhigu, ka dibna ay dadku ku gadoodeen maadaama oo lacagtii laga qaaday, sidoo kale waxa jirtay in aanay culimadu ogolayn in bandhigaasi qabsoomo.

Dadka qaar ayaa noo sheegay in weerarkan fanaaniinta loo geystay ay ahayd mid qorshaysan oo lagu baajinayey bandhigaasi, oo lagu soo dhex daray dad doonayey inay khalkhalgaliyaan inay qabsoonto bandhigaasi.

Badhasaabka gobolka Togdheer Axmed Xaaji Cabdilaahi Xamarji oo aanu khadka Telefoonadda kula xidhiidhay ayaa sheegay in aanay dhibaato soo gaadhin fanaaniinta, oo uu xaalkoodda ka war hayo, haseyeeshee, waxa uu ka gaabsaday inuu ka warbixiyo qaabkay wax u dhaceen.

Guddoomiyaha kooxda Abwaan: Xasan Dhuxul Laabsalaax oo aan khadka Telefoonka kula xidiidhay isagoo Burco jooga, ayaanay ii suurtogalin in aan helo ka dib markii uu qaban waayey telefoonkiisa gacanta.

Si kastaba ha ahaatee, kooxdan fanaaniinta ah ayaa ku soo guuldaraystay inay bandhigaasi u hirgalo, isla markaana laba jeer oo ay isku dayeen aanay suurtogal noqon,  waxase xusid mudan in Cigaal Hotel oo bandhiga lagu qabanayey aan la geyn ciidan ku fulin, taasina ay keentay in khasaaraha gaadiidka loo geystay ay badato.

Kooxdan fanaaniinta ah ayaa taageerayaal badan ku leh magaaladda Hargeysa si weyna looga jecel yahay, waxaanay ilaa xalay dadweynuhu hadal hayeen dhibaatadda fanaaniintaasi loo geystay, isla markaana waxay muujinayeen inay aad uga xun yihiin dhibtaasi soo gaadhay.

Barkhad-Ladiif M. Cumar, Hiiraan Online
[email protected] 
Hargeysa, Somaliland













Click here
4/7/2013 1:35 PM EST
Axad, Abriil 07, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) iyo wafdi uu hoggaaminayo oo ku sugan dalka Norway ayaa waxay kulammo isugu jira wadatashi iyo kuwo howleed la qaateen hay’adda NDI oo taageerta baarlamaanka Soomaaliyad.

4/7/2013 12:11 PM EST
Axad, April 07, 2013(HOL): Waxaa shalay lagu qabtay magaalada Stockholm ee dalka Sweden shir sanadeedkii Ururka Isbaheysiga Umadda Soomaaliyeed, kaasi oo ay ka qeybgaleen wakiillada xisbiga ee dalka Sweden.

4/7/2013 9:10 AM EST
Axad, Abriil 07, 2013 (HOL) — Wakiilka Midowga Afirka ee Soomaaliya, danjire Maxmaed Saalax Anaadiif oo ay wehliayaan taliyaha guud ee ciidamada AMISOM, Jen. Andrew Gutti, madaxa xafiiska Qaramada Midoobay ee taageera AMISOM (UNSOA), Amadou Carama iyo taliyaha ciidamada Kenya ee qaybta ka ah AMISOM, Maj-Gen. Francis K. Nthenge ayaa booqasho ku tagay magaalada Kismaayo ee gobolka Jubbada Hoose.

4/7/2013 9:02 AM EST
Axad, Abriil 07, 2013 (HOL) — Madaxweynaha Somaliland Axmed Maxamed Maxamuud Siillaanyo, ayaa maanta soo saaray amar wax lagaga qabanayo ciddii ka hor timaadda shirkadda Shiidaalka ka baadhaysa deegaano ka mid ah Bariga Somaliland.

4/7/2013 8:35 AM EST
Axad, Abriil 07, 2013 (HOL) — Gudoomiyihii golaha deegaanka Hargeysa, isla markaana ahaa Maayarkii Hargeysa Eng:Yusuf Warsame Siciid ayaa saaka ku geeriyooday wadanka imaaraadka Carabta oo uu muddo ku xanuunsanayay.

4/7/2013 8:22 AM EST
Axad, Abriil 07, 2013 (HOL) — Wafdi ka socda dowladda federaalka oo ka kooban wasiirro, xildhibanno iyo mas’uuliyiinta maamulka gobollka Hiiraan ayaa maanta gaaray magaalada Baladweyne.

4/7/2013 8:18 AM EST
Axad, Abriil 07, 2013 (HOL) — Magaalada Baydhabo ayaa waxaa lagu aasay marxuum Xasan Maxamed Nuur (Shaati-guduud) oo horraantii bishan ku geeriyooday isbitaal ku yaalla dalka Jarmalka, waxaana aaskiisa ka qayb-galay xubno ka tirsan dowladda Soomaaliya.

4/7/2013 8:09 AM EST
Axad, Abriil 07, 2013 (HOL) — Sannad ka hor ayey ahayd markii bangiyada dalka Mareykanku ay ku dhawaaqeen in aysan la shaqeynaynin xawaaladaha Soomaalida, islamarkaasna ay xireen guud ahaan xisaabaadkii iyo koontooyinkii ay ku lahaayeen, iyagoo xiligaasi ku andaacoonayey cabsi ay ka qabaan in lacagta fara badan ee xawaaladuhu u diraan gudaha Soomaaliya ay ku dhacdo gacan qaldan ama tan kooxda Al-shabab oo ay dowladda Mareykanku u aqoonsan tahay argagixiso.

4/7/2013 7:53 AM EST
Axad, Abriil 07, 2013 (HOL) — Iyadoo ay dhowr todobaad oo qura ka harsan yihiin xilliga la shaaciyey in ay qabsoomi doonto doorashada goleyaasha deegaanka ee Puntland - oo ah tii ugu horeysey ee nooceeda ah- ayuu shalay golaha wakiillada ee Puntland cod aqlabiyad leh ku meel mariyey qodobo uu guddiga doorashooyina codsaday in wax laga bedelo.

4/7/2013 7:48 AM EST
Axad, Abriil 07, 2013 (HOL) — Wefdi ballaaran oo ka socda dalka koonfur Afrika oo gelinkii danbe ee shalay soo gaarey magaalada Garoowe ee xarunta maamulka Puntland, ayaa kulamo la qaatay madaxweynaha Puntland Cabdiraxmaan Maxamed (Faroole) iyo xubno ka tirsan golaha wasiirrada.

4/7/2013 1:35 AM EST
Axad, Abriil 07, 2013 (HOL) — Dowladda Soomaaliya oo ka jawaabaysay digniin ay dowladda Ingiriisku ku sheegtay in Muqdisho ay ka dhici karaan falal argagaxiso ayay dowladda Soomaaliya sheegtay inaysan jirin hadda khatar muuqata oo ka jirta Muqdisho.

4/7/2013 1:34 AM EST
Axad, Abriil 07, 2013 (HOL) — Maydkii Xasan Maxamed Nuur (Shaati-guduud) oo toddobaadkii hore ku dhintay dalka Jamalka ayaa saakay laga soo dajiyay garoonka diyaaradaha caalamiga ah ee Muqdisho, halkaasoo lagula tunayo salaadda janaasada, kaddibna waxaa loo duulinayaa degmada Baydhabo ee gobolka Bay si halkaas loogu aaso.