Afar qof oo dhawaan deegaanka Sool-joogto ee Degmada Buuhoodle lagu Afduubay oo Xoriyadoodii loosoo celiyay

Khamiis, Ogoosto 23, 2012 (HOL) — Afar qof oo dhalinyaro ah oo dhowaan lagu afduubay deegaanka Sool-joogto ee degmadda Buuhoodle ayaa kooxdii afduubatay sii daysay ka dib markii odayaasha iyo waxgaradka Buuhoodle waanwaan ka galeen siideyntoodda.

Odayaasha Buuhoodle oo baryahan dambe ku hawlanaa sidii loo sii deyn lahaa afartan qof ee maleeshiyadu ku afduubatay Deegaankaasi ayaa ku guulaystay, waxaana shalay galinkii dambe lagu soo wareejiyey gacanta Odayaasha, waxaana la filayaa in maanta ay iyaguna ku wareejin doonaan odayaashii afartan qof laga haystay.

Afartan qof ee dhawrka toddobaad ka hor lagu qafaashay deegaanka Buuhoodle ayaa la sheegay inay ahaayeen arday wax ka barata dugsiyadda magaaladda Burco, kuwaas oo fasaxoogii u tagay Reerahoodii oo degan Miyiga, ka dibna ay kooxdani halkaas ka kaxaysteen.

Odayaasha afartan dhalinyarada ah laga afduubay ayaa warbaahinta u sheegay inay u mahadcelinayaan odayaashii isku xil saaray soo deyntii dhalinyaradaasi, waxaanay xuseen inay aad u fiican yihiin xaaladooda caafimaadna ay wacan tahay.

“waxaanu u mahad-celinaynaa waxgaradka ka damqaday ee ka hawlgalay sidii afartan dhallinyarada ah ee ardayda ah loo sii dayn lahaa, waanan ku ammaanayaa siday hawshaas u galeen”ayuu yidhi Maxamed Cawil oo ka mid ah odayaasha afartan wiil oo ka hadlayey kaalinta ay odayaasha reer Buuhoodle ka qaateen siideyntooda.

Afartan qof ayaa loo afduubay sidii loogu bedelan lahaa nin la yidhaa Jaamac Kuutiye oo arrimo argagixiso ugu xidhnaa muddo sanado ah xabsiyada Somaliland, haseyeeshee lama oga waxay isku af garteen odayaasha Reer Buuhoodle iyo kooxdan haysatay afarta qof.

Barkhad-Ladiif  M. Cumar, Hiiraan Online  
[email protected]
Hargeysa, Somaliland