Dad kasoo jeeda gobollada Bay iyo Bakool oo maanta dibadbaxa ka dhigay Boosaaso iyo Maamulka oo la hadlay

Talaado, September 13, 2011 (HOL) — Guddoomiyaha gobolka Bari Cabdisamad Maxamed Gallan oo maanta la hadlayay dad ka badan boqolaal qof oo kasoo jeeda gobollada koonfureed ee dalka Soomaaliya ayaa wax laga xumaado ku tilmaamay  hadal masuuliyiin ka tirsan baarlamaanka Soomaaliya ay jeediyeen,kaasi oo ahaa in dadka ka soo jeeda beelaha Digil iyo Mirifle lagu dhibaateeyo deegaanada Puntland.

"Ma ahan mid qarsoon in dadka deegaanadaasi  ay maanta Puntland ku haystaan ganacsiyo kala duwan oo aysan jirin cid ku fara galisa, isla markaana xuquuqdooda la dhowro "ayuu yiri gudoomiyaha oo sheegay in dowladdu ay canbaaraynayso ciddii hadaladaasi warbaahinta ka sheegtay.

Waxaa kaloo gudoomiyaha uu sheegay in gobolka Bari uu yahay meesha ugu badan ee ay ku nool yihiin dad  ka soo barakacay koonfurta wadanka Soomaaliya ,isagoo xusay in dadkaasi sanad walba loo qabto adeegyo dheeri ah oo la xiriira waxyaabaha ay u baahanyihiin sida in la siiyo goobo ay ku nastaan marka ay gobolka yimaadaan.

"Xildhibaanada hadalkan uu ka soo yeeray waxaa haboon in ay yimaadan gobolkan oo ay arkaan sida ay waxyihiin intii ay shirar eedayn ah qaban lahaayeen," ayuu hadalkiisa ku daray gudoomiyaha ,isagoo oo tilmaamay in Puntland ay soo dhawayn wacan u samaysay dadka ka soo jeeda gobollada Koonfureed gaar ahaan gobollada Bay iyo Bakool.

"Waxaa dowladda uu waajib ka saaranyahay cid kasta oo gobolkeeda ku nool,mana jirto maanta cid kala faquuq ku samaysa dadkaas ka so jeeda koonfurta," ayuu mar kale yiri gudoomiyaha ,isagoo ugu baaqay masuuliyiinta wax eedeeyay in ay raali galin ka bixiyeen hadalka guuxan dhaliyay.

Dhinaca kale wasiirka amniga Puntland Khaliif Ciise Mudan  oo isna la hadlay warbaahinta ayaa  beeniyay in Puntland lagu dhibaateeyo dadka koonfurta ka soo jeeda, waxaana uu xusay in ay jiraan dad lagu tuhunsanahay in amniga qal-qal ay ku hayaan, kuwaasoo qaarkood su'aallo lagu waydiinayo magaalooyin kala duwan oo gobolka ka tirsan.

Ugu danbayntii dadka maanta dibad baxa ka sameeyay Bosaaso qaarkood ayaa sheegay in xildhibaanadii shirka  ku qabtay magaalada Muqdisho aysan iyga matalin,waxaana ay sheegeen in Puntland gudaheeda ay amni iyo ganacsi  ka heleen markii ay u soo barakaceen.

Faysal Maxamed Hassan, Hiiraan Online
[email protected]
Boosaaso, Soomaaliya