Fadhi uu Baarlamaanka Soomaaliya maanta ku yeelan lahaa Muqdisho oo dib dhac uu ku yimid iyo Mas'uul ka hadlay dib u dhaca

Axad, May 30, 2010 (HOL) − Kulan lagu waday in lagu doorto guddoomiye ku xigeennada Baarlamaanka Soomaaliya oo ay maanta Xildhibaannada Soomaaliya ku yeelan lahaayeen Magaalada Muqdisho ayaa dib u dhacay.

Mas'uul ka tirsan guddiga doorashada ayaa u sheegay warbaahinta in dib u dhaca kulanka uu ku yimid iyadoo guddoomiyaha Baarlamaanka Sheekh Shariif Sheekh Axmed uu hayo xilka Madaxweynaha Soomaaliya, maadaama uu Madaxweynuhu dhoofay.

"Guddiga Doorashada iyo Guddoomiyaha Baarlamaanka ayaa kulan yeelanaya maanta waxayna kaga hadli doonaan xilliga ay qabsoomayso doorashada guddoomiye ku xigeennada baarlamaanka" ayuu yiri Xildhibaan Maxamed Aadan Waayeel oo ah Afhayeenka guddiga doorashada.

Waayeel wuxuu sheegay inuu jiro go'aan lagu gaaray in doorashada la hakiyo 5-maalmood oo ay horay u dalbatay Maxkamadda sare, si xal looga gaaro dacwad uu gudbiyay Prof. Dalxa oo ah guddoomiye ku xigeenka 1-aad Baarlamaanka oo aan xilkiisa horay isaga casilin.

Guddoomiyaha Baarlamaanka Shariif Xasan Sheekh Aadan ayaa ka sheegay fadhigii lagu doortay Jimcihii in Maanta oo Axad ah ay Xildhibaannadu kulan ku yeelan doonaan Muqdisho, inkastoo xilligaas uusan sheegin in lagu dooranayo guddoomiye ku xigeennada iyo in kale.

Fadhigan baaqday ayaa noqonaya kii ugu horreeyay oo baaqda iyadoo guddoomiye cusub loo doortay Baarlamaanka Soomaaliya, kaasoo helay codadka inta badan mudanayaashii codeynayay maalintii doorashada ee Jimcaha.

Maxamed Xaaji Xuseen, Hiiraan Online
[email protected]
Muqdisho, Soomaaliya