Qaraxyo xalay iyo saaka ka dhacay Magaalada Beledweyne

Jimco, 5, Juun, 2009 (HOL) Goor dhaweyd waxaa magaalada Beledweyne gilgilay qarax aad u weyn oo ka dhacay Suuq Xoolaha lagu iibiyo oo ku yaala Xaafadda Howl-wadaag, waxaana inta ilaa hadda la og-yahay Qaraxaasi ku geeriyootay Labo Ruux oo rayid ah oo sida dad goob joogayaal ah u sheegeen HOL ilaa hadda aan la aqoonsan.
 
Suuqa Xoolaha ee goor dhaw uu qaraxa ka dhacay ayaa ah goob dadku siweyn ugu badan islamarkaana waa suuqa kaliya ee looga ganacsado Xoolaha ee ka furan Magaalada Beledweyne, waxaana xusid muda in xiliga uu qarax ka dhacay uu ahaa Suuqu mid aad u mashquul badan.
 
Lama oga in Qaraxu ka dhashay Bam gacanta laga tuuray iyo in uu ahaa mid meesha horay loogu sii aasay, dadkuna waxaa ay ilaa hadda isweydiinayaan sababta keentay in Suuqa la weeraro maadaama aysan joogin Ciidamo ka tirsan Maamulka.
 
Dhinaca kale isla habeenimadii xalay ayaa waxaa weerar loo adeegsaday Ban kuwa gacanta laga tuuro ah lagu qaaday Saldhiga Baliiska Magaalada Beledweyne halkaa oo aan ka fogeyn Hotelka uu ka degan yahay Magaalada Beledweyne Wasiirka Amniga Qaran Col. Cumar Xaanshi Aadan.
 
Weerarkaasi wax qasaaro ah mageysan waxaana xiligaa kadib Ciidamada Nabad-galyadu bilaabeen in ay ridaan rasaas u muuqatay mid lagu kala dirayo dadka wali magaalada ku sii harsan si loo xaqiijiyo Nabad-galyada.
 
Qaraxyadan is xig xiga ee ka dhacay Magaalada Beledweyne ayaa ku soo beegmaya xili dhawaan Magaalada Beledweyne ay soo gaareen Xubno uu horkacayo Wasiirka Amniga Qaranka Col. Cumar Xaanshi Aadan oo sheegay in ay la dagaalami doonaan kooxaha ka soo horjeeda Dowladda Soomaaliya.
 
C/raxmaan Diini, Hiiraan Onlin
[email protected]