Dagaallo u dhexeeya DFKMG ah iyo kooxaha kasoo horjeeda oo xalay ka dhacay Degmada Hodan ee Muqdisho

Khamiis, December 31, 2009(HOL): Dagaallo u dhexeeya ciidamada DFKMG ah iyo kooxaha kasoo horjeeda xalay ku dhexmaray degmada Hodan ee Magaalada Muqdisho ayaa sababay inay dhintaan ugu yaraan 3-qof oo shacab u badan ayna dhaawacmaan 9-qof oo kale.

Iskahorimaadkan oo bilowday 9:00-fiidnimo ee xalay ayaa socdya muddo hal saac ah, waxaana dhinacyada dagaalku u dhexeeyay ay isku adeegsanayeen hubka noocyadiisa kala duwan.

"Madfac ku dhacay guri ku yaalla xaafadda Taleex ee Degmada Hodan ayaa sababay dhimashada hal qof iyo dhaawaca afar qof oo kale, kuwaasoo ahaa dad rayid ah oo xaafaddaas ku noolaa" ayuu yiri goobjooge ku sugan degmada Hodan.

Goobjoogaha ayaa sidoo kale sheegay in madfac ku dhacay xaafadda Kaaso-bololaare uu sababay dhimashada 1-qof iyo dhaawaca saddex qof oo kale, oo ku sugnaa gurigooda.

Dagaalkan ayaa bilowday sida ay sheegeen saraakiisha DFKMG ah kaddib markii weerar lagu soo qaaday saldhig ay ku sugnaayeen ciidamadooda oo ku yaalla meel ku dhow Tarabuunka iyo Carwadii hore ee Muqdisho, ayna guulo ka gaareen.

Wasiir-u-dowlaha gaashaandhigga Soomaaliya Sheekh Yuusuf Indhacadde oo dagaalka ka hadlay ayaa sheegay inuu ahaa mid u dhexeyay ciidanka dowladda iyo kooxaha kasoo horjeeda ayna horumar ka gaareen.
Yuusuf Indhcadde, wuxuu sheegay inay qabsadeen saldhigyo ay horay ugu sugnayeen kooxaha kasoo horjeeda oo ku yaalla degmada Hodan, inkastoo kooxaha dowladda ah kasoo horjeeda aysan ka hadlin dagaalka.

Maxamed Xaaji Xuseen, Hiiraan Online
[email protected]
Muqdisho, Soomaaliya