Jimco, Octobar 04, 2019 (HOL )– Madaxweynihii hore ee Somaliland Daahir Rayaale Kaahin ayaa kulan iskugu keenay madax dhaqameedka gobolka Awdal si uu u xaliyo khilaafyadii beelaha ee doorashadii madaxtooyadu keentay.
Tan iyo intii doorashadii
madaxtooyada Somaliland ka dhacday Somaliland waxay bulshada kaga tagtay
tafaraaruq iyo inay bulshaddu kala qaybsanto, si arrintaasi xal loogu helleo
ayuu haldoorkii bulshada iyo madax dhaqameedkii gobolka Awdal uu iskugu keenay.
“madax dhaqameedkii galbeedka
Somaliland ayuu isku kaayo yeedhay, waxaana ku galnay shir balaadhan oo
midnimada Somaliland ah, dardaaran iyo waayeelnimo ayuu halkan isku kaayo
yeedhay, in xanaftii doorashadda iyo hadaladii hawada la isku marinayey ayaanu iskaga
garownay buu ahaa kulankani”ayuu yidhi Suldaan Dhowal oo ujeedadda shirka ka
hadlayey.
“waxa laga wada hadlayey mar
hadii doorashadii laga baxay dhibaatadii ay keentay ee qabyaalad ahayd aynu ka
baxno oo aynu ka midawno kuwa soo socda si wanaagsan ha loo gallo, waxaana lagu
wada shaqaynayaa walaaltinimo iyo midnimada Somaliland, si loogu dhaqaaqo
horumarka gobolada galbeedka”ayuu yidhi Suldaan Samatar.
Intaas ka dibna waxa ka hadlay
madaxweynihii hore ee Somaliland Daahir Rayaale waxaanay sheegay in ujeedadda
uu u qabtay shirkan ay tahay ka dib markii uu arkay hadaladii aan wanaagsanayn
ee hawada la isku marin jirey in la soo afjaro oo midnimadii bulshada dib loo
soo celiyo.
“Kulankani wuxuu ahaa shir lagaga
hadlayey in qardoofooyinkii ka dhacay doorashadda ka midowdaan oo dantiina u
noqotaan si u wanaagsan dalka iyo umadaba aad u maamushaan, oo qabyaalad loo
kala raacin xisbiyada ee qof waliba ninka uu doonayo uu doorto oo aad u midowdaan danta Somaliland iyo ta
gobolkaba”ayuu yidhi madaxweyne Rayaale oo dardaar siinayey madaxdhaqameedka
iyo odayaasha gobolada galbeedka Somaliland.
Barkhad-ladiif M. Cumar, Hiiraan Online
[email protected]
Hargeysa, Somaliland.