Madaxweyne Biixi oo soo xidhay wejigii labaad ee Barnaamijka carbiska dhallinyarada ee Shaqo Qaran
Axad, May 26, 2019 (HOL)- Madaxweyne Muuse Biixi ayaa
maanta soo xdihay wejiga koowaad ee barnaamijka carbiska dhallinyarada ee shaqo
qaran oo muddo saddex bilood ah ka socday deegaanka Darar-weyne ee dhinaca
waqooyi Bari kaga beegan caasimadda Hargeysa.
Munaasibadda uu madaxweynuhu
kusoo xidhay wejiga koowaad ee barnaamujka shaqo qaran, ayaa waxa ka qaybgalay
xubno kamid ah golaha wasiirrada, taliyayaasha ciidamada kala duwan ee qaranka,
qaar kamid ah madaxda hay’adaha madaxa bannaan ee qaranka, hoggaanka
barnaamujka shaqo qaran, siyaasiyiin, waxgarad, iyo haldoor kale.
Agaasimaha guud ee Barnaamujka
shaqo qaran Maxamed Xuseen Cismaan (Mu’addinka), ayaa ka hadlay faaiidadda uu
leeyahay barnaamijkani waxa uu yidhi “Waxa aan si kalsooni ku jirto halkan uga sheegayaa in muddadii barnaamujka
shaqo qaran socday si mug leh loo gaadhay himilooyinkii la higsanayey oo ay ugu
mudnaayeen is-dhexgalka, isu kal-samaanta iyo is-weheshiga dhallinyarada
Somaliland, waxa bislaaday ilaa heer wacyiga iyo aqoonta dhallinyarada ee
dhinacyada sooyaalka taariikheed, dhaqameed, dhaqaale, bulshadeed iyo
Juquraafiga dalka Somaliland, waxana abuurmay dareen waddaniyadeed iyo mid
sharci, waxana dhismay garaadkii iyo caafimaadkii jidh ahaaneed ee
dhallinyada.”
Wasiirka wasaaradda
gaashaandhigga, Mudane Cabdiqani Maxamuud Caateeye, Taliyaha ciidanka militeriga,
Sarreeye gaas Nuux Ismaaciil Taani iyo Marwo Edna Aadan Ismaaciil oo hadallo ka
jeediyey madasha lagu soo xidhay wejiga koowaad ee barnaamujka shaqo qaran,
ayaa si isku mid ah u bogaadiyey mashruucan, waxana ay tilmaameen inuu
barnaamujkani tusaale u yahay sida ay Somaliland iskeed u qabsan karto wax
kasta oo ay u aragto inay horumarin karaan dadkeeda iyo dawladnimadeeda.
Madaxweynaha Somaliland, Mudane
Muuse Biixi Cabdi oo soo xidhay wejiga labaad ee Barnaamujka shaqo qaran, ayaa
ammaanay mashruucan, isaga oo taxay ujeeddooyinka iyo natiijooyinka laga
doonayo barnaamujka qaran ee shaqo qaran, waxana isaga oo arrimahaas ka hadlaya
uu yidhi, “Shaqo qaran waa xarunta aynu doonaynno inuu caqliga Somaliland ka
shaqeeyo oo uu hore u mariyo, shaqo qaran waxa aynnu ka rabnaa inay dadku
noqdaan qaar If iyo Aakhiroba wax taransada, shaqo qaran waxaynu doonaynaa inay
dadku ka helaan waajibka uu qaranku ku leeyahay, isagana uu qaranku ka helo
xuquuqda qaranku ka rabo, ujeeddada aynnu shaqo qaran u Aas-aasnayna waa
tabobar maskaxeed iyo mid jidheed.”
Waxaanu intaas ku daray“Waxa aan
cod dheer cid walba ugu sheegayaa inay Barnaamujka shaqo qaran maanta u
dareereen iyaga oo guutooyin xoog leh sidii ay dalkooda hore ugu marin
lahaayeen ee ay mutadawacnimo ugu shaqayn lahaayeen, gobollada oo dhan, cadowgu
haka naxo Somaliland-na haku faraxdo,”
Dhallinyaradan ayaa haatan wixii
ka dambeeya geli doonta wejiga labaad ee Barnaamujka shaqo qaran, kaas oo noqon
doona carbis shaqo (Internship) iyo adeeg bulsho (Social Service) is barkan,
waxana ay muddada wejigan labaad ay noqon doontaa 9-10 (Sagaal ilaa toban)
bilood.
Dhallinyaradda shaqo qaran, waxay
si madax banaan iskugu qoreen qof waliba meesha uu doonayo inuu ka shaqeeyo ama
uu cilmigeeda soo bartay, waxaana wasaarada waxbarashadda lagu qoray 713
dhallinyaro oo wiilal iyo hablaba iskugu jira, wasaaradda Caafimaadka 313
wiilal iyo hablaba iskugu jira, wasaarada shaqo galinta iyo arrimaha bulshadda
29 qof baa lagu qoray, wasaaradda Beeraha 95 qof baa lagu qoray, wasaarada deegaanka iyo horumarinta reer Miyiga, lagu qoray 26 dhallinyaro ah, wasaarada Tamarta iyo
macdanta waxa isku qoray 11 dhalinyaro ah oo cilmigaasi soo bartay, wasaaradda
cadaalada waxa lagu qoray 15 dhallinyaro ah, wasaaradda xoolaha iyo Kalluumaysiga waxa lagu qoray 52 qof, wasaarada
Arrimaha gudaha iyo dawladaha hoose ee dalka waxa lagu qoray 33 dhalinyaro ah, Ciidanka Badda waxa lagu
qoray 10 dhalinyaro ah oo bartay cilmiga Badaha, iyo sidoo kale, 120 dalbaday inay ku biiraan ciidamada kala duwan
ee dalka.
Sidoo kale, waxay shirkadda
shiidaalka sifaysa oo dhowaan laga furey magaaladda Berbera sheegtay inay
qaadanayso 400 oo dhalinyaradan ka mid ah oo lagu soo tobabari doonno dalka
shiinaha muddo laba sanno ah.
Ugu dambayntii waxa uu madaxweyne
Muuse Biixi Cabdi shahaado sharaf guddoonsiiyey agaasimaha Barnaamujka shaqo
qaran, taas oo ka markhaati ah sida xilkasnimada leh ee uu uga midho dhaliyey
barnaamujka shaqo qaran ee loo xilsaaray oo ka mid ah himilooyinka waaweyn ee
madaxweynaha qaranka.
Barkhad-ladiif M. Cumar, Hiiraan Online
[email protected]
Hargeysa, Somaliland.