Garoowe oo la ciirciireysa marti-galinta siyaasiyiintii ugu badneyd Abid oo kala socda dowladda dhexe iyo Mucaaradka
Jimco, Janaayo, 25, 2019 (HOL) –Magaalada
Garoowe ee xarunta maamul gobolleedka Puntland waxaa saacadihii ugu danbeeyay
tagay siyaasiyiintii ugu badneyd Abid oo kala socda dowladda dhexe iyo
Xisbiyada mucaaradka kuwaa oo la filayo in ay maalinta berri
ka wada qeyb gallaan munaasabada calleemo saarka hoggaanka cusub ee Puntland.
Dhinaca dowladda waxaa ku sugan
magaalada Wafdi ballaran oo ka kala socda Labada Aqal ee baarlamaanka oo kala
hoggaaniyaan guddoomiye Golaha Aqalka sare Cabdi Xaanshi Cabdullaahi iyo
guddoomiye ku-xigeenka labaad ee Golaha Shacabka Mahad Cabdalle Cawad, Wasiirro
iyo xildhibaanno ka tirsan dowladda Soomaaliya.
Sidoo kale waxaa ku sugan
magaalada Garoowe madaxda maamul gobolleedyada Jubbaland, Koonfur Galbeed,
Hirshabeelle iyo Galmudug oo aan isku mowqif ka aheyn dhamaantood marka la eego
sida loo wajahayo siyaasada iyo xiriirka dowladda dhexe ee Soomaaliya.
Tusaale ahaa madaxweynayaasha
dowlad gobolleedyada Jubbbaland iyo Galmudug kama aysan qeyb galin calleemo
saarkii ugu danbeeyay ee madaxweynaha maamulka Koonfur Galbeed Cabdicasiis
Maxamed Xassan Lafta-Gareen ee ka dhacday magaalada Baydhabo oo ay ku kala
aragti duwan yihiin siyaasada iyo wada shaqaeynta Dowladda dhexe.
Waxaa kaloo ka mid ah mas’uuliyiintii
maanta Garoowe lagu soo dhaweeyay madaxweynihii hore ee dowladda Soomaaliya
Xassan Sheekh Maxamuud iyo hoggaamiyaha Xisbiga Wadajir Cabdiraxmaan Cabdishakuur
Warsame.
Maalinta berri ah oo la filayo in
la qabto munaasabada calleemo saarka hoggaanka cusub ee Puntland ayaa lagu wadaa in uu gaaro magaalada Garoowe madaxweynaha dowladda Soomaaliya Maxamed
Cabdullaahi Farmaajo iyo wafdi ka socda beesha caalamka.
Dadka intiisa badan ayaa u arka waxa ka socda magaalada Garoowe ‘’
Dhuula-Tus Siyaasadeed’’ iyo loolan u dhaxeeya dowladda dhexe iyo siyaasiyiinta
mucaaradka oo dhinac walba uu doonayo in uu soo jiito hoggaanka cusub ee
Puntland oo aan wali la ogeyn mowqifkooda la xiriira wada-shaqeynta dowladda
dhexe iyo jiritaanka Isbaheysiga dowlad gobolleedyada oo ay hadda ku sii harsan
yihiin madaxda dowlad gobolleedyada Jubbaland iyo Galmudug marka laga reebo maamulada
Koonfur Galbeed iyo Hirshabeelle oo wada sheqyn dhaw la leh dowladda dhexe ee
federaalka.
Madaxweynaha dowladda Soomaaliya
Maxamed Cabdullaahi Farmaajo ayaa dhawaan qoraal uu soo saaray ku sheegay in
dowladda dhexe mar walba diyaar u tahay wada shaqeyn dhaw oo ay la yeelato
dowlad gobolleedyada dalka, gaar ahaan waxaa uu baaq u diray hoggaanka cusub ee
loo doortay maamullada Koonfur Galbeed iyo Puntland oo uu kula dardaarmay in ay
xoojiyaan xiriirka kala dhaxeeya xukuumadda federaalka.
C/raxmaan Diini, Hiiraan Online
[email protected]