Jimco, Janaayo, 25, 2019 (HOL)-Dabkan oo burburay qeybo ka
mid ah suuqa ugu weyn degmada Wadajir ayaa ugu danbeyntii lagu guuleystay in la
damiyo sida ay warbaahinta u sheegeen mas’uuliyiinta degmada iyo saraakiisha
ciidamada.
Saraakiisha ayaa sheegay in markii uu dabku kacay
gurmad deg deg ah ka heleen kooxaha gurmadka, gaar ahaan shirkadda Hormuud.
Lama oga khasaaraha rasmiga ah ee dabkani uu
geystay, hasse ahaatee waxaa ay saraakiisha ciidamada iyo mas’uuliyiinta
maamulka degmada intaba sheegeen in uu bur buriyay goobo ganacsi oo hanta badanni
tiilay, laakiin aan wali si rasmi ah loo ogaan inta uu khasaaruhu gaarsiisan
yahay.
Taliyaha Saldhig Galbeed ee Ciidanka Booliska
Soomaaliyeed Maxamed Daahir ayaa warbaahinta u sheegay in baaritano lagu sameyn
doono waxyaabaha soo celceliyay gubashadda Suuqyadda Muqdisho, islamaraana la
xisaabtami doonaan Shirkaddaha Korontada.
Gudoomiye ku xigeenka Amniga iyo Siyaasadda
gobolka Banaadir Maxamed Cabdullaahi Tuulax ayaa sheegay in uu si aad ah ugu
mahadcelinaayo Kooxaha gurmadka deg dega ah oo ay ku horreyso Shirkadda oo
Hormuud oo dadaal badan ku bixiyay in dabka uusan gaarin Goobo kale oo ka mid
ah Suuqa.
Dabkan ayaa imanaya wax ka yar labo todobaad
markii uu sida kale dab weyn oo baaxda leh qabsaday Suuqa Bakaaraha ee
magaalada Muqdisho oo ka mid ah xarumaha ganacsiga ugu waaweyn guud ahaan marka
la eego geeska Africa.
C/raxmaan Diini, Hiiraan Online
[email protected]