Africom : ka hadalka khasaaraha weerarrada duqeymaha waxaan u deynay dowladda Soomaaliya
Jimco, Janaayo, 25, 2019 (HOL)-Taliska howlgalka Mareykanka ee Africom ayaa sheegay in ay sii xoojinayaan weerarrada duqeymaha ah ee ka dhanka ah Al-shabaab.
Laakiin dhinaca kale taliska howlgalka Mareykanka ee Africom ayaa sheegay in ka hadalka khasaaraha duqeymaha ay ka geystaan Soomaaliya u daayeen dowladda Soomaaliya oo ay tahay in ay warbaahinta la wadaagto tirada dhimashada iyo khasaaraha Al-shabaab ka soo gaaray weerarada.
Arrintan ayaa imaneysa iyadoo aad moodo in dowladda Soomaaliya iyo taliska Mareykanka tiro is khilaafsan mar marka qaar ka sheegaan khasaaraha soo gaaray dagaalyahannada Al-shabaab marka ay dhacaan weerarrada duqeymaha.
Howlgal todobaadkii hore lagu beegsaday Al-shabaab oo ka dhacay meel dulleedka ka ah magaalada Kismaayo ayeey dowladda Soomaaliya sheegtay in lagu dilay 73 dagaalyahan oo ka tirsan Al-shabaab , laakiin taliska Mareykanka ayaa sheegay in howlgalkaas ku dileen 52 dagaalyahan oo ka tirsan Al-shabaab.
Maraykanka ayaa kordhiyay weeraradii duqeymaha ahaa ee uu la beegsan jirey Al-Shabaab tan iyo markii uu talada dalkaas la wareegay Donald Trump.
C/raxmaan Diini, Hiiraan Online
[email protected]