Wasiir Cawad : Wakiilka Qaramada Midoobey wuxuu dhaqmay si ka baxsan nidaamka iyo dhaqanka diblomaasiyadda
Arbaco, Janaayo, 02, 2019 (HOL) – Wasiirka Wasaarradda
arrimaha dibedda xukuuumadda Soomaaliya Axmed Ciise Cawad ayaa faah faahin
dheeraad ah ka bixiyay war qoraal ah oo ka soo baxay xafiiskiisa, kaa oo dalka
looga mamnuucay wakiilka gaarka ah ee Qaramada Midoobey u qaabilsan arrimaha Soomaaliya Nicholas
Haysom
Isaga oo la hadlay BBC ayuu Wasiir Cawad sheeegay
in ergayga uu galay khaladaad badan, isla markaana uu wasiirka amniga gudaha
ula dhaqmay sida mas'uul isaga ka amar qaata.
"Mr Haysom wuxuu dhinac maray nidaamka iyo
dhaqanka diblomaasiyadeed, wuxuu u dhaqmay sida inuu yahay madaxa ama maamulaha
dowladda Soomaaliya. Marka wuxuu cay ku yahay dhaqanka UN-ta, wuxuuna gef weyn
ka galay qaranka iyo madax-bannaanida Soomaaliya," ayuu yiri wasiir Axmed Ciise
Cawad.
Wasaaradda arimaha dibedda ayaa ku wargelisay
xoghayaha guud ee Qaramada Midoobay, António Guterres, in Nicholas Haysom aan
laga rabin isla markaana aanu ka shaqeyn karin Soomaaliya, sidaa awgeedna loo
baahan yahay inuu dalka uga baxo sida ugu dhaqsaha badan.
Tallabadan ay qaaday dowladda ayaa ka danbeysay
kaddib markii Wakiilka Qaramada Midoobey uu ka dalbaday dowladda Soomaaliya in
ay jawaab cad ka bixiso wax yaabihii ka dhacay Baydhabo, xariggii Mukhtaar
Rooboow, dad lagu dilay dibadaxyo iyo waliba ku dhawaad 300 oo shacab ah oo
sida uu hadalka u dhigay la xir xiray.
Laakiin jawaabta dowladda Soomaaliya ayaa noqotay
in uu dalka isaga baxo, waxaana qoraalka Wasaarradda arrimaha dibedda lagu
sheegay in aan Nicholas Haysom dalka looga baahneyn.
C/raxmaan Diini,
Hiiraan Online
[email protected]
