Weerar lagu qaaday saldhig ciidamada dowladda ay ku leeyihiin deegaanka Bariirre
Isniin, Augusto, 19, 2019 (HOL)- Warar dheeraad
ah ayaa ka soo baxaya dagaal culus oo ciidamo ka tirsan kuwa dowladda
Soomaaliya iyo ururka Al-Shabaab xalay ku dhexmaray deegaanka Bariirre ee
Gobolka Shabeellaha hoose.
Dagaalka ayaa yimid kaddib markii Ururka
Al-Shabaab ay weerareen Saldhig ciidamo ka tirsan kuwa Millateriga Soomaaliya
gaar ahaan kuwa DANAB ay ku leeyihiin dulleedka deegaanka Bariire halkaas oo
dhowr bilood ka hor ay ciidanka dowladda la wareegeen.
Ciidamada dowladda ayaa dhawaan Al-shabaab kala
wareegay deegaanno dhowr ah oo ka tirsan gobolka, gaar ahaan degmada Awdheegle
iyo deegaanno hoostaga.
Taliyaha Ciidamada Lugta ee xoogga dalka
Soomaaliyeed Janeraal Odawaa Yuusuf Raage ayaa sheegay inay ka hortageen
weerarka Al-Shabaab ku soo qaadeen Saldhiga Ciidamada Dowladda,isla markaana ay
uga dileen in ka badan 20 dagaal yahan.
“Waxaan xaqiijineynaa in aan khasaaro badan
gaarsiinay Al-Shabaab, 20 ka tirsan ayaa ciidamada dowladda ku dileen duleedka
Bariire, kadib markii ay isku dayeen inay soo weeraraan saldhiga ciidamada ee
Bariire ayuu yiri Janeraal Odawaa”.
Wali ma jiro wax war ah oo ka soo baxay dhinaca Al-Shabaab,waxaana
wararka aan saakay soo baxaya sheegayaan in ciidamada Dowladda ay duleedka
Bariirre ka wadaan dhaq dhaqaaqyo ciidan.
C/raxmaan Diini, Hiiraan Online
[email protected]