Hay’addo lagu eedeeyay in ay musuqmaasuqaan deeqaha loogu talagalay dadka beeraleyda ah
Axad, April, 07, 2019 (HOL)- Maamul gobolleedka
Hirshabeelle ayaa ku eedeeyay qaar ka mid ah hay’addaha samafalka in ay musuq
maasuq ku sameeyaan deeqaha loogu talagalay dadka beeraleyda ah.
Wasiir ku xigeenka Beeraha iyo Waraabka Maamul
goboleedka Hirshabelle xildhibaan Maxamed Bashiir Qaasim Daqarre ayaa sheegay
in wasaaradiisu ogaatay in hay’adaha qaarkood ay musuq maasuq ku sameeyeen
deeqaha loogu talo galay dadka Beeraleyda ah.
Wasiirka ayaa sheegay in ay hay’addaha 30% oo
kaliya gaarsiiyaan dadka beeraleyda ah gargaarka ama deeqaha loogu talagalay
isaga oo arintaana digniin ka soo saaray.
‘’Waxaan ugu digeynaa gaar ahaan madaxda hay’addaha
samafalka in ay musuq-maasuqaan gargaarka yar ee lagu caawiyo dadka beeraleyda
ah’’ ayuu yiri Wasiir Daqarre.
Ma uusan sheegin magacyada hay’addahan uu
tilmaamay balse wuxuu sheegay in ay ka warhayaan hay’addahan tallaabooyinka ay
qaadayaan.
Dadka ku dhaqan maamul gobolleedka Hirshabeelle
ayaa intooda badan ah dad beeraley ah, kuwaa oo u baahan in laga saacido sidii
ay ugu fududaan laheyd tacabka dhulka.
C/raxmaan Diini,
Hiiraan Online
[email protected]