Gudoomiyaha xisbiga WADDANI oo madaxweyne Biiixi ku eedeeyey inuu bulshadii kala qaybinayo
Talaado, April, 30, 2019 (HOL)- Guddoomiyaha
Xisbiga mucaaradka ah ee WADDANI Cabdiraxmaan Maxamed Cabdillaahi (Cirro)
ayaa sheegay in aanay dhici Karin in laba xisbi oo kaliya doorasho
galaan,isla markaana aanay ogolaan doonin taageerayaashoodu inay ka qaybgalaan
diiwaangalinta codbixiyeyaasha dhowaan la doonayo in la bilaabo.
“Waxa la yaab leh in Madaxweynihii aynu
Qarankan u dooranay in uu hoggaamiyo oo dalka mideeyo uu ka door biday in uu
bulshada qayb ka mid ah madaxweyne u noqdo. Haddii madaxweynihii Qaranku in uu
Qarankan madaxweyne u noqdo ka door biday in uu Kulmiye iyo UCID madaxweyne u
noqdo dalka intiisa kale madaxweyne la’aan mayso. Haddii Madaxweynuhu ka door
biday oo ay waajibkiisa ahayd in uu dalkan doorasho Qaran u qabto oo axsaabtu u
siman tahay oo uu go’aansaday in uu Kulmiye iyo UCID doorasho u qabto inta
kalena doorasho la’aan mayso,” ayuu yidhi gudoomiye Cirro.
Waxa kale oo uu farriin u diray bulshada
Somaliland iyo Taageerayaasha xisbiga “Waxaan u sheegaya shacbiga iyo umadda
reer Somaliland in haddii xukuumaddii iyo labadii xisbi yidhaahdeen shacbiga
kala badh baanu ka tashanayna in aanay inta kalena talo la’aan doonin. Waxaan u
sheegaya oo aan faraya dhammaan taageerayaasha xisbiga WADDANI, haddii ay
joogaan gobol, haddii ay joogaan degmo in aanay marnaba aqbalin diwaangelin iyo
doorasho laba xisbi wataan, farriintaas ayaan gaadhsiinaya dhammaan
taageerayaasha WADDANI,” Sidaas ayuu yidhi Dr Cabdiraxmaan Cirro.
Sadexda xisbi markii ay ku heshiiyeen waayeen
doorashada soo socota, waxa labadda xisbi ee KULMIYE iyo UCID ku heshiiyeen
inay sidaas ku galaan doorasho, haseyeeshee waxa meesha ka maqan xisbigii
3aad ee WADDANI, waxaanay labadda xisbi aragtidooda ay heshiihska ku
yihiin u soo bandhigeen baarlamaanka iyo komishanka doorashooyinka.
Barkhad-ladiif M. Cumar, Hiiraan Online
[email protected]
Hargeysa, Somaliland.
