Talaado, April, 30, 2019 (HOL) – Maxkamada
gobolka Banaadir ayaa ugu danbeyntii maanta soo gabagabeysay dhageysiga dacwad
ka dhan aheyd kiiskii Dilka ahaa ee
bishii September ee sanadkii hore 2018 loogu geystay magaalada Muqdisho gaar
ahaan degmada Yaaqshiid Axmed Mukhtaar
Saalax Dowlo.
Muuse Macalin Maxamed oo ah
guddoomiyaha maxkamada gobolka Banaadir ayaa ku dhawaaqay xukunka dilka ah ee lagu
riday eedeysanayaasha loo heystay dilka muwaadinkaas Soomaaliyeed oo si xun loo
dilay, lana gubay.
Dadka xukunka dilka ah lagu riday ayaa kala ah Xuseen Iidow Maxamed, Asli
Cabdulle iyo Aweys Iidow Maxamed, kuwaa oo la sheegya in ay ka danbeeyeen dilka
marxuumka.
Sidoo kale Maxkamadda ayaa sii deysay afar qof oo kale oo iyana ku eedeysnaa
falka dilkaas, waxaana lagu waayay wax dami ah.
Guddoomiyaha Maxkamadda Gobolka Banaadir Muuse Macalin ayaa sheegay in
xukunkan uu racfaan ka furan yahay.
C/raxmaan
Diini, Hiiraan Online
[email protected]
