Sabti, September, 22, 2018 (HOL)- Somaliland
waxa muran ka dhex abuuray xeerka kufsiga oo golaha Wakiiladu ansixiyeen,
madaxweynuhuna dhaqangaliyey, taas oo keentay in qaybaha kala duwan ee
bulshadda si weyn uga qayliyaan.
Xeerkan muranka dhaliyey ayaa dadka diidan ku
doodayaan inuu ka hor imanayo shareecada islaamka, isla markaana laga soo
minguuriyey dalalka Reer Yurub, waxaana madaxweynaha loogu baaqay inuu
xeerkaasi dib loogu celiyo golaha Wakiiladda.
Wasiirka Diinta iyo aw qaafta Sheekh Khaliil
Cabdilaahi ayaaa sheegay inuu madaxweynuhu dib uga fiirsanayo xeerkaasi,isla
markaana qiimeyn lagu samayn doonno xeerkaasi.
Culimadda ayaa shalay jimcihii masaajidadka kaga
hadlay xeerkan oo ay ku tilmaameen mid shareecada islaamka ka hor imanaya,
waxaanay ku doodeen in shareecada la waajiyo xeerkan.
Xeerkan ayaa ahmiyada saaraya qofkii xoog lagu
kufsado, taas oo dadka qaar u arkaan inuu sinaddii fasaxayo mar haddii labada
qof is ogol yihiin caadi ka dhigayo, halka labada qof ee aan is ogolayn ee mid
qasbo uun dambi ka dhigayo xeerku.
Xeerkan waxa dabada ka riixaya ururada haweenka,
waxaana hore uga hor yimid golaha Guurtidda oo isagu wax ka bedel ku sameeyey,
isla markaana dib ugu celiyey golaha Wakiilada inuu soo waafajiyo shareecada,
haseyeeshee golaha wakiiladdu markiiba uu u gudbiyey madaxweynaha taas oo
keentay inuu madaxweynuhu wareegto ku soo saaro dhaqangalka xeerkan.
Golaha Guurtida ayaa qaranka u qaabilsan arrimaha
diinta, dhaqanka iyo nabadgalyada, waxaanay sheegeen ka qayliyeen xeerkaasi loo
tahriibiey madaxtooyadda ee iyaga mar labaadkii la soo marin waayey si ay u
hubiyaan in wax laga bedelay iyo in kale, maadaama oo markii hore intay wax ka
bedel ku sameeyeen dib ugu celiyey golaha Wakiilada si ay u taageeraan wax ka
bedelkaasi lagu samayey.
Dadweynuhu waxay badankooda dhaliilayaan golaha
Wakiiladda oo xeerkan ka soo gudbay, taas oo ahayd inay waafajiyaan shareecada
islaanka iyo dhaqanka.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
