Maamulka Koonfur galbeed oo ka digay in garsoor loo aado deegaannada ay maamulaan Al-shabaab
Sabti, Augusto, 26, 2017 (HOL) – Maamulka
Koonfur galbeed ayaa digniin adag u diray dadka garsoorka u raadsada degaanada
ay gacanta ku hayaan Al-Shabaab .
Koonfur Galbeed waxa ay sheegtay in dadkaasi tilaabo adag laga qaadi doonto,
islamarkaana cidii lagu helo la marsiin doono ciqaab adag.
Taliyaha ciidamada booliiska gobolka Baay iyo wasiirka amniga maamulka
Koonfur Galbeed Xassan Xusseen Eelaay, ayaa digniintaan si wadajir ah u soo
saaray.
Col Mahad C/raxmaan Aadan taliyaha ciidamada booliiska maamulka Koonfur
Galbeed, ayaa shacabka Baydhabo ku nool u sheegay in aysan aadi karin dhulka Al-shabaab
ay joogaan, sidoo kalena aysan u tagi karin arrimo Garsoor.
“Maxkamadda Al-shabaab dadka aada, oo Al-shabaab u dacwooda ayaa la faray ciidamada booliiska
in ay qabtaan golaha wasiirada ayaana-na faray, cidii lagu arko iyadoo Al-shabaab
u dacwoonaysa, in la soo qabto sharciga in la horgeeyo oo maxkamadda ciidamada
la geeyo, tallaabo sharci ah ayaana laga qaadi doonaa.” ayuu yiri taliyaha
ciidamada booliska gobolka Baay.
Maamulka Koonfur Galbeed ayaa bilihii la soo dhaafay soo saaray digniino
kala duwan oo ku wajahan dadka xiriirka la sameeya dagaalyahanada Al-shabaab.
C/raxmaan Diini,
Hiiraan Online
[email protected]
