Talaado, Augusto, 15, 2017 (HOL) – Madaxweynaha dowlad gobolleedka Hirshabeelle Cali Cabdullaahi Cosoble oo maalintii shalay la sheegay in kalsoonida lagala noqday ayaa waxba kama jiraan ku tilmaamay go’aankii xildhibaannada.
Madaxweynaha oo ay bar bar taagnaayeen xildhibaanno ku dhawaad 50 gaaraya
ayaa sheegay in uu wali yahay madaxweynaha maamulka Hirshabeelle, isaga oo ku
gacanseyray go’aankii baarlamaanka.
‘’Waa sharci darro mooshinka iyo go’aanka la gaaray intaba, sidaana xilka la
iigama qaadi karo, walina waxaan ahay madaxweynaha maamulka Hirshabeelle ayuu
yiri’’ Cali Cabdullaahi Cosoble.
Dhinaca kale guddoomiyaha baarlamaanka maamulka Hirshabeelle Cismaan Barre
Maxamed ayaa Jowhar ka sheegay in go’aankii ay ka gaareen xildhibaannada
madaxweynaha uu ahaa mid sharci, xilkana uu si ku-meel-gaar ah u sii heyn doono
madaxweyne ku-xigeenka.
Maamulka Hirshabeelle ayaa hadda u muuqda mid labo garab u kala jabay oo
dhinac walba uu sheeganayo in uu sharciga ku taagan yahay.
C/raxmaan Diini,
Hiiraan Online
[email protected]
